ԵՐԵՎԱՆ, 12 մայիսի — Sputnik. Հայաստանի նախագահ Սերժ Սարգսյանն ընդունել է ԵԽԽՎ մոնիտորինգի հանձնաժողովի Հայաստանի մասով համազեկուցողներ Ալան Միլին և Ջուզեպպե Գալատիին, մասին տեղեկացնում է ՀՀ նախագահի աշխատակազմի տեղեկատվության և հասարակայնության հետ կապերի վարչությունը։
Զրուցակիցներն անդրադարձել են ԵԽ-ին անդամակցությամբ Հայաստանի ստանձնած պարտավորությունների կատարման ընթացքին, երկրում իրականացվող բարեփոխումներին, ինչպես նաև առաջիկա ծրագրերին: Հանրապետության նախագահը կարևորել է համազեկուցողների հետ պարբերական բնույթ ստացած երկուստեք օգտակար հանդիպումներն ու քննարկումները:
Սերժ Սարգսյանը վստահություն է հայտնել, որ ս.թ. մայիսի 21-ին պաշտոնապես մեկնարկող՝ Եվրոպայի խորհուրդ-Հայաստան 2015-2018թթ. գործողությունների ծրագիրը Հայաստանը պատշաճ կիրականացնի: ՀՀ նախագահն ընդգծել է, որ Հայաստանը վստահորեն շարունակելու է բարեփոխումները՝ այն համոզմունքով, որ հաջողության, առաջընթացի հասնելու այլ ճանապարհ գոյություն չունի: Սերժ Սարգսյանը նշել է, որ մեր երկիրը պատրաստ է ԵԽ-ի հետ ավելի սերտ համագործակցության վերոնշյալ նպատակներին հասնելու համար:
Համազեկուցողները բարձր են գնահատել բարեփոխումների արդյունքում Հայաստանում նկատելի առաջընթացը, երախտագիտություն հայտնել ՀՀ նախագահին՝ ժողովրդավարական գործընթացները Հայաստանում առաջ մղելու նրա ջանքերի համար և վստահեցրել, որ ԵԽ-ն խրախուսում է իրականացվող աշխատանքը՝ այդ ճանապարհին շարունակական հաջողություններ տեսնելու ակնկալիքով:
Հանդիպմանն անդրադարձ է եղել նաև ԼՂ հակամարտության գոտում հրադադարի խախտման պատճառով վերջին շրջանում արձանագրված լարվածության աճին և խնդրի կարգավորմանն ուղղված բանակցային գործընթացի վերսկսման հնարավորություններին: Համազեկուցողների խնդրանքով` նախագահ Սերժ Սարգսյանը հանգամանորեն ներկայացրել է իրավիճակը և իր մոտեցումները բանակցությունների վերսկսման հեռանկարի վերաբերյալ:
