ԵՐԵՎԱՆ, 13 մայիսի- Sputnik. Կառավարության նպատակը հարուստների դեմ պայքարելը չէ, այլ որ այդ միլիոնները ձեռք բերվեն օրինական ճանապարհով, ուրբաթ լրագրողներին ասաց Հայաստանի կառավարության աշխատակազմի ղեկավար, նախարար Դավիթ Հարությունյանը։
«Մենք չենք ձգտում, որ երկրում միլիոնատերեր չլինեն։ Մեր նպատակն այն է, որ մարդիկ օրինական ճանապարհով կարողություն կուտակեն»,- ասաց Հարությունյանը` մեկնաբանելով որոշ պաշտոնյաների «միլիոնավոր» հայտարարագրերին վերաբերող հարցն ու մի հին անեկդոտ հիշեց։
«Դեկաբրիստի կինը թոռնուհու հետ անցնում է ցուցարարների կողքով։ Կինը հարցնում է թոռնուհուն, թե ինչ են ուզում ցուցարարները և ի պատասխան լսում է` որ հարուստներ չլինեն։ «Իսկ մենք` դեկաբրիստներս, ժամանակին ուզում էինք, որ աղքատներ չլինեն»»,- պատմեց Հարությունյանը։
Նրա խոսքով` կառավարությունը նույնպես հարկ չի համարում պայքարել հարուստների դեմ, այլ ձգտում է ապահովել նրանց գործունեության թափանցիկությունը և օրինականությունը։ Հարությունյանը կարծում է, որ հենց այդ համատեքստում էլ կատարվել է Հայաստանի վարչապետի հայտարարությունը, որն արդեն մի շարք քայլեր է սահմանել այդ ուղղությամբ։
Ավելի վաղ Հովիկ Աբրահամյանը կառավարության նիստում առաջարկել էր աշխատանքներ անցկացնել պետական կառավարման համակարգի բարելավման ուղղությամբ։
