ԵՐԵՎԱՆ, 13 մայիսի — Sputnik. ԱՄՆ պետքարտուղար Ջոն Քերին Վիեննայում Ռուսաստանի և Ֆրանսիայի ներկայացուցիչների հետ կքննարկի Ղարաբաղի իրավիճակը, հայտնել է պետքարտուղարի պաշտոնական ներկայացուցիչ Ջոն Կիրբին։
«Քերին մայիսի 16-17-ին կլինի Վիեննայում։ Նա կմասնակցի Հայաստանի և Ադրբեջանի նախագահներ Սերժ Սարգսյանի և Իլհամ Ալիևի հետ հանդիպմանը, որը ԱՄՆ-ն կանցկացնի Ռուսաստանի և Ֆրանսիայի հետ համատեղ»,– գրված է հաղորդագրության մեջ։
Ղարաբաղյան հակամարտության գոտում իրավիճակը սրվել էր ապրիլի 1-ի լույս 2-ի գիշերը։ Երևանը հաղորդել էր ադրբեջանական կողմի նախահարձակ գործողությունների մասին, Բաքուն էլ հայտարարել էր, թե իբր Հայաստանի ԶՈւ-ն է գնդակոծել ադրբեջանական տարածքը։ Հակամարտող կողմերը տասնյակ զոհեր ունեն։ Ապրիլի 5-ին Մոսկվայում ռազմական գործողությունները դադարեցնելու մասին պայմանավորվածություն է ձեռք բերվել, սակայն երկու կողմերն էլ հայտարարում են, որ փոխադարձ պայմանավորվածությունը պարբերաբար խախտվում է։ Ադրբեջանը կրակում է նաև Հայաստանի սահմանամերձ գյուղերի ուղղությամբ։
