ԵՐԵՎԱՆ, 16 մայիսի — Sputnik. Կալանավորվել է Արարատի ոսկու կորզման ֆաբրիկայի անվտանգության աշխատակից Զոհրաբ Ա.- ն, ով մեղադրվում է գործընկերների հետ կազմակերպված խմբով ֆաբրիկայից խոշոր չափերով ոսկի պարունակող հանքանյութ գողանալու համար, հայտնում է ՀՀ հատուկ քննչական ծառայության լրատվական ծառայությունը։
«Գեոպրոմայնինգ Գոլդ» ընկերության անվտանգության աշխատակից Զոհրաբ Ա.-ն, նախնական համաձայնության գալով ֆաբրիկայի պաշտոնատար անձանց հետ, 2014 թվականի դեկտեմբերին ընդգրկվել է ոսկու հանքանյութի հափշտակության նպատակով ստեղծված կազմակերպված խմբում:
Լինելով ֆաբրիկայի անվտանգության ստորաբաժանման աշխատակից` ստորաբաժանումում, Զոհրաբ Ա.-ն միջոցներ չի ձեռնարկել ֆաբրիկայի տարածքում տեղադրված տեսախցիկներով արձանագրված հանցավոր խմբի կողմից կատարվող հափշտակությունները կանխելու ուղղությամբ, իսկ հայտնաբերման վտանգի դեպքում`նախազգուշացրել վերջիններին։ Բացի այդ` նա հանել է սարքավորումների վրա փակցված կապարակնիքները`իր գործընկերների համար նպաստավոր պայմաններ ստեղծելով խտանյութի հափշտակության համար։
Հանցավոր խումբն, այսպիսով, ըստ գործի նյութերի, ոսկու կորզման ֆաբրիկայից մեծ քանակությամբ ոսկու հանքաքար է հափշտակել, վերամշակել, ձուլել և վաճառել ստացված ոսկու ձուլակտորը։
Զոհրաբ Ա.-ից բացի` նույն քրեական գործով մեղադրանք է առաջադրվել ևս 15 անձի: Նախաքննությունը շարունակվում է:
