ԵՐԵՎԱՆ, 17 մայիսի — Sputnik. Հայաստանի և Ադրբեջանի միջև բանակցությունները կարող են սկսվել միայն Լեռնային Ղարաբաղի մասնակցությամբ, լրագրողներին ասաց ՀՅԴ խմբակցության ղեկավար Արմեն Ռուստամյանը:
Վիեննայում Հայաստանի և Ադրբեջանի նախագահներ Սերժ Սարգսյանի և Իլհամ Ալիևի հանդիպման արդյունքում Երևանն ու Բաքուն պայմանավորվածություններ են ձեռք բերել Ղարաբաղում հրադադարի ռեժիմի ապրապնդման, ինչպես նաև հակամարտության գոտում միջադեպի հետաքննության մեխանզիմների ներդրման վերաբերյալ:
«Այս հանդիպումը բանակցություն չի եղել, սա պարզապես հանդիպում էր, քանի որ բանակցային գործընթացին պետք է մասնակցի Ղարաբաղը», — ասել է Ռուստամյանը:
Ընդհանուր առմամբ Ռուստամյանը դրական է գնահատել երկու նախագահների հանդիպումը, սակայն հիշեցրել է, որ բանակցություններ սկսելու համար Հայաստանը երեք նախապայման է առաջ քաշել:
Ավելի վաղ Սերժ Սարգսյանը բանակցություններ սկսելու համար երեք նախապայման էր բարձրաձայնել: Խոսքը վստահության միջոցների և միջադեպերի հետաքննության մեխանիզմների ներդրման, հասցեական հայտարարությունների և երաշխիքների մասին է, որ Ադրբեջանը նորից չի գնա ագրեսիայի ԼՂ ժողովրդի նկատմամբ:
«Գլխավոր ձեռքբերումներից է այն, որ պետք է կյանքի կոչվեն միջադեպի հետաքննության մեխանիզմները և ընդլայնվեն ԵԱՀԿ գործող նախագահի անձնական ներկայացուցչի լիազորությունները», — ասել է Ռուստամյանը:
Նրա խոսքով` սա կարելի է դրական սկիզբ համարել:
Ղարաբաղյան հակամարտության գոտում իրավիճակը սրվել էր ապրիլի 1-ի լույս 2-ի գիշերը։ Երևանը հաղորդել էր ադրբեջանական կողմի նախահարձակ գործողությունների մասին, Բաքուն էլ հայտարարել էր, թե իբր Հայաստանի ԶՈւ-ն է գնդակոծել ադրբեջանական տարածքը։ Հակամարտող կողմերը տասնյակ զոհեր ունեն։ Ապրիլի 5-ին պայմանավորվածություն է ձեռք բերվել ռազմական գործողությունները դադարեցնելու մասին, սակայն երկու կողմն էլ հայտարարում է, որ փոխադարձ պայմանավորվածությունը խախտվում է։ Ադրբեջանը կրակում է նաև Հայաստանի սահմանամերձ գյուղերի ուղղությամբ։
