ԵՐԵՎԱՆ, 19 մայիսի — Sputnik. ՀՀԿ ԳՄ մայիսի 19-ի նիստում քննարկվել են ներքաղաքական հարցեր՝ կապված Ընտրական օրենսգրքի հետ, նաև քննարկել են ՀՀ նախագահի՝ Վիեննա կատարած այցի արդյունքները, նիստից հետո լրագրողներին հայտնեց ԱԺ փոխնախագահ, ՀՀԿ մամուլի քարտուղար Էդուարդ Շարմազանովը։
Շարմազանովը հայտնեց, որ Վիեննայում որևէ նոր փաստաթուղթ չի քննարկվել։
Նրա խոսքով` խնդիրը պետք է համապարփակ լուծվի, որևէ մեկը չի կարող լռեցնել Արցախի ժողովրդի անկախության ձայնը։
Ըստ Շարմազանովի` նիստի ընթացքում քննարկել են նաև Ազգային ժողովի քառօրյան, Ընտրական օրենսգիրքը, ևս մեկ անգամ արձանագրել են, որ քաղաքական ուժերը և քաղաքական մեծամասնությունը պատրաստակամ են անել ամեն ինչ, որպեսզի առաջիկայում լինի բարեփոխված Ընտրական օրենսգիրք:
«Մենք տեսանք, որ խորհրդարանում հիմնականում կա համախմբում, և Ընտրական օրենսգիրքը 95 ձայնով երկրորդ ընթերցմամբ ընդունվեց: Հույս ունենք, որ մայիսի 25-ին՝ արտահերթ նիստի ժամանակ, նման ծանրակշիռ ձայներով կընդունվի Ընտրական օրենսգիրքը»,- ասաց Շարմազանովը:
