ԵՐԵՎԱՆ, 20 մայիսի- Sputnik. Լեռնային Ղարաբաղի հակամարտությունը կարող է լուծվել միայն խաղաղ ճանապարհով, Պետերբուրգում հայտարարել են Հայաստանի Ազգային ժողովի փոխխոսնակ Հերմինե Նաղդալյանը և Ադրբեջանի Միլի մեջլիսի նախագահի տեղակալ Վալեհ Ֆեյրուզ օղլի Ալեքսերովը։
«Հակամարտությունը ռազմական լուծում չի կարող ունենալ, միայն խաղաղ բանակցությունները կարող են ինչ-որ արդյունքի հանգեցնել… Հենց հետևողական և հասցեական գնահատականի բացակայությունն է հանգեցրել նրան, որ 20 տարի հակամարտության կարգավորումը դոփում է տեղում, և դրա հետևանքն է նաև ապրիլյան պատերազմը»,- ասել է Նաղդալյանը։
Նրա խոսքով` «ապրիլի սկզբին աննախադեպ ագրեսիա է եղել Լեռնային Ղարաբաղի ժողովրդի դեմ, և խախտվել են հրադադարի մասին համաձայնագրերը»։
«Դրանից հետո մայիսի 16-ին հանդիպումներ են եղել ԵԱՀԿ երկրների արտգործնախարարների նախաձեռնությամբ և մասնակցությամբ։ Մենք որոշակի հույսեր ունենք, որ այդ հանդիպման ժամանակ ձեռք բերված պայմանավորվածությունները կպահպանվեն։ Նկատի ունեմ այն, որ 1994-95թթ.-ի զինադադարի մասին պայմանագրին հետևելու մշտական դիտարկում է անցկացվելու և միջադեպերի հետաքննության մեխանիզմներ են ներմուծվելու»,- հայտարարել է նա։
Ադրբեջանի Միլի մեջլիսի նախագահի տեղակալ Վալեհ Ֆեյրուզ օղլի Ալեքսերովն իր հերթին նշել է` Ադրբեջանը շահագրգռված է, որ հակամարտությունը խաղաղ լուծում ունենա։
«Մենք շահագրգռված ենք, որ հակամարտությունը լուծվի խաղաղ ճանապարհով և կշարունակենք այդ ուղղությամբ Ադրբեջանի Հանրապետության տարածքային ամբողջականության շրջանակում։ Հուսով ենք, որ հետագա բանակցությունները իրավիճակի խաղաղ կարգավորման կհանգեցնեն»,- ասել է նա։
Ղարաբաղյան հակամարտության գոտում իրավիճակը սրվել էր ապրիլի 1-ի լույս 2-ի գիշերը։ Երևանը հաղորդել էր ադրբեջանական կողմի նախահարձակ գործողությունների մասին, Բաքուն էլ հայտարարել էր, թե իբր Հայաստանի ԶՈւ-ն է գնդակոծել ադրբեջանական տարածքը։ Հակամարտող կողմերը տասնյակ զոհեր ունեն։ Ապրիլի 5-ին Մոսկվայում ռազմական գործողությունները դադարեցնելու մասին պայմանավորվածություն է ձեռք բերվել, սակայն երկու կողմերն էլ հայտարարում են, որ փոխադարձ պայմանավորվածությունը պարբերաբար խախտվում է։ Ադրբեջանը կրակում է նաև Հայաստանի սահմանամերձ գյուղերի ուղղությամբ։
