ԵՐԵՎԱՆ, 30 մայիսի — Sputnik. Նիստի մասնակիցները կքննարկեն ԵՏՄ գործունեության խնդիրները, ինչպես նաև արտասահմանյան պետությունների հետ առևտրի հարցերը:
Կրեմլի մամուլի ծառայությունը հայտնում է, որ Եվրասիական տնտեսական գերագույն խորհրդի նիստին կմասնակցեն ՌԴ նախագահ Վլադիմիր Պուտինը, ՀՀ նախագահ Սերժ Սարգսյանը, Ղազախստանի նախագահ Նուրսուլթան Նազարբաևը, Բելառուսի նախագահ Ալեքսանդր Լուկաշենկոն, Ղրղըզստանի նախագահ Ալմազբեկ Աթամբաևը:
«ԵՏՄ անդամ պետությունների ղեկավարները կքննարկեն ինտեգրացման խորացման հեռանկարները, ներառյալ՝ գազի, նավթի և նավթամթերքների ընդհանուր շուկաների ձևավորումը, կարծիքներ կփոխանակեն արտասահմանյան երկրների և տարածաշրջանային ինտեգրացիոն միավորումների հետ առևտրատնտեսական կապերի ընդլայնման շուրջ: Բանակցությունների արդյունքների համաձայն՝ մի շարք փաստաթղթեր կստորագրվեն»,-նշված է Կրեմլի մամուլի ծառայության հաղորդագրության մեջ:
Վլադիմիր Պուտինը երկկողմ հանդիպում կունենա Ղազախստանի նախագահ Նուրսուլթան Նազարբաևի հետ:
Այսօր հհ նախագահ Սերժ Սարգսյանն աշխատանքային այցով կմեկնի Լյուքսեմբուրգ (Լյուքսեմբուրգի Մեծ Դքսություն)՝ մասնակցելու Եվրոպական ժողովրդական կուսակցության 40-ամյակին նվիրված հոբելյանական գագաթնաժողովին:
