Աբխազիայի «Աֆոն» ակումբի 32-ամյա հայ կիսապաշտպան Արմեն Կապիկյանը ConIFA 2016 աշխարհի առաջնությունում հանդես է գալիս Արևմտյան Հայաստանի հավաքականում, որը պետք է իր երկրորդ խաղն անցկացնի Աբխազիայի թիմի դեմ։ Դժվար իրավիճակի և բարդ որոշման մասին ֆուտբոլիստը պատմել է Sputnik Աբխազիային տված հարցազրույցում։
- Արմեն, ինչպե՞ս է ստացվել, որ խաղում եք ConIFA առաջնությունում Արևմտյան Հայաստանի կազմում։
— Ես Աբխազիայի քաղաքացի եմ, ես սիրում եմ իմ հայրենիքը և հաճույքով հանդես կգայի նրա հավաքականի կազմում, սակայն Աբխազիայի թիմի կազմում ես չընդգրկվեցի, իսկ առաջնությանը մասնակցելու հնարավորությունը բաց թողնել չէի ցանկանում։ Ես չէի կարծում, որ իմ որոշումը շատերի կողմից բացասական կընդունվի։ Ֆուտբոլն առաջին հերթին, սպորտաձև է, որը չպետք է տարաձայնությունների առիթ դառնա։
- Դուք մասնակցելո՞ւ եք Աբխազիայի դեմ այսօրվա խաղում։
— Ոչ, այսօրվա խաղը ես բաց եմ թողնում, կրկին նրա համար, որ ոմանք այդպես վերաբերվեցին դրան, սակայն ես անկեղծ ցանկանում եմ, որ Աբխազիայի հավաքականը հաղթի։ Իմ ողջ ֆուտբոլային կարիերայի ընթացքում, իսկ ես երկար տարիներ հանդես եմ եկել ռուսական տարբեր թիմերում, բոլորը գիտեին, որ ես Աբխազիայից եմ։ Նույնիսկ դեպք է եղել, երբ Ռուսաստանի սպորտի նախարար Վիտալի Մուտկոն ինձ որպես աբխազ է ներկայացրել։ Ես կարծում եմ` սա ինչ-որ բան նշանակում է։
- Դա ազդե՞լ է «Աֆոնի» թիմի անդամների հետ հարաբերությունների վրա։
— Անձամբ ես որևէ մեկին վատություն չեմ արել, իսկ եթե ինչ-որ մեկի վերաբերմունքն իմ նկատմամբ փոխվել է, դա իր սեփական գործն է։ Ես ինչպես նախկինում էի բոլորի հետ շփվում, այնպես էլ հետագայում եմ շփվելու։ Շատերն ինձ զանգահարում են և ջերմ խոսքեր են ասում, աջակցում են ինձ, գովում, սակայն, իհարկե, ինձ հաճելի չէ, որ ոմանք ամեն ինչ այդպես ընկալեցին։
- Այն միտքը, որ եթե Արևմտյան Հայաստանը հաղթի այս առաջնությունում, ապա Աբխազիայում թեկուզ մեկ հատ հաղթողի մեդալ կմնա, քեզ ինչ-որ կերպ ջերմացնո՞ւմ է։
— Իհարկե։ Եթե բոլորը դրան այդպես վերաբերվեին, որևէ խնդիր չէր լինի։ Ես իմ կյանքը նվիրել եմ ֆուտբոլին և իմ ներդրումն ունեցել Աբխազիայի ֆուտբոլի զարգացման գործում։ Օրինակ` 2001 թվականին իմ շնորհիվ ընկերական խաղ եղավ Աբխազիայի հավաքականի և «Դինամո Սանկտ Պետերբուրգ» ՖԱ-ի միջև։ Դա վերջին ժամանակներում առաջին թիմն էր, որ Աբխազիա էր եկել։
