ԵՐԵՎԱՆ, 1 հունիսի — Sputnik. Ադրբեջանը պետք է բանակցությունների սեղանի շուրջ նստի Ղարաբաղի հետ և ճանաչի Լեռնային Ղարաբաղը, ասաց ԱԺ պատգամավոր Թևան Պողոսյանը։
Նա նշեց, որ հայկական բանակը դաս տվեց, որը փոփոխությունների սկիզբ դրեց, արդյունքում հնարավոր դարձավ Վիեննայում արբանյակային հետաքննություն անցկացնելու և մոնիտորինգի մեխանիզմներ մշակելու վերաբերյալ Ադրբեջանի հետ համաձայնություն ձեռք բերել, ինչին Բաքուն 22 տարի չէր համաձայնում։
«Կառուցողական քայլ կլինի, եթե Ադրբեջանն առաջինը ճանաչի ԼՂՀ-ն և Ղարաբաղի հետ բանակցությունների սեղանի շուրջ նստի», — ասաց Պողոսյանը։
Բաքվի բազմամշակութայնության միջազգային կենտրոնի խորհրդական, քաղաքագետ Տոֆիկ Աբասովն իր հերթին նշեց, որ երկխոսության համար գլխավոր պայմանը կլինի գրավյալ տարածքների ազատումը։
«Հայկական կողմը երեք անգամ շատ տարածք է գրավել և չի ցանկանում ազատել», — ասաց նա։
Ընդ որում` Աբասովը նշեց, որ Ռուսաստանը պետք է ճնշում գործադրի Հայաստանի վրա Ղարաբաղյան հակամարտության վերջնական կարգավորման համար։
Կողմերը համաձայնվեցին հստակեցնել ղարաբաղյան հակամարտության խաղաղ կարգավորման օրակարգը։
Ղարաբաղյան հակամարտությունը սրվեց ապրիլի 2-5–ն ընկած ժամանակահատվածում։ Երևանը հայտարարեց, որ Ադրբեջանը նախահարձակ գործողություններ է սկսել, Բաքուն էլ իր հերթին հայտարարեց, որ հայկական կողմն է կրակում Ադրբեջանի ուղղությամբ։ Պաշտոնական տվյալների համաձայն` հակամարտության երկու կողմն էլ զոհեր ունեցան, այդ թվում` խաղաղ բնակիչների շրջանում։
Ապրիլի 5-ին Մոսկվայի աջակցությամբ կողմերը պայմանավորվեցին դադարեցնել ռազմական գործողությունները, սակայն շփման գծում խախտումները շարունակվում են մինչ օրս։ Մայիսի 16-ին Վիեննայում կայացավ Հայաստանի և Ադրբեջանի նախագահներ Սերժ Սարգսյանի և Իլհամ Ալիևի` հակամարտության թեժացումից հետո առաջին հանդիպումը, որին մասնակցեցին նաև ԵԱՀԿ Մինսկի խմբի համանախագահները։
Սարգսյան-Ալիև հանդիպմանը համանախագահող երկրների ներկայացուցիչները պնդեցին 1994թ.–ի զինադադարի և 1995թ.–ի զինադադարի ամրապնդման մասին համաձայնագրերի անշեղ իրագործման անհրաժեշտությունը: Համաձայնություն ձեռք բերվեց քայլեր ձեռնարկելու դրանց իրականացման մշտադիտարկման և միջադեպերի հետաքննության մեխանիզմի ներդրման, ԵԱՀԿ գործող նախագահի անձնական ներկայացուցչի թիմի կարողությունների ավելացման, հակամարտության կարգավորման բանակցային գործընթացի հնարավոր վերսկսման ուղղությամբ։
