ԵՐԵՎԱՆ, 7 հունիսի — Sputnik. «Հրապարակ» թերթին հաջողվել է մանրամասներ պարզել: Խաչատրյանն իր «Ֆորդ տրանզիտով» երթևեկելիս է եղել Սովետաշենի ավտոխճուղով, երբ նկատել է հոսքին հակառակ՝ կանոնների խախտմամբ երթեւեկող ավտոմեքենա: Եղիշե Խաչատրյանը, որը, ասում են, բարեկիրթ անձնավորություն էր, առանց տոնը բարձրացնելու նկատողություն է արել ավտոմեքենայի երիտասարդ վարորդին՝ սխալ վարելու համար:
Վարորդը ծանր է տարել նկատողությունը: 4-5 ընկերների հետ նա իջել է ավտոմեքենայից և կոպիտ հայհոյանքներ ուղղել Խաչատրյանին: Վերջինս էլ բարկացել է, քանի որ հայհոյանքները լսել է նաև մայրը, որը մեքենայում է եղել: Նա դուրս է եկել և հարվածել է հայհոյողին:
Ծեծկռտուք է սկսվել: Խուլիգանները դաժանորեն ծեծել են տղամարդուն, հարվածել գլխին ծանր երկաթե ձողով, սպանել են նրան մոր աչքի առջև և դիակը թողնելով ճանապարհին, հեռացել:
Թերթի տեղեկություններով`խուլիգաններն Արեշ թաղամասից են, թաղային հեղինակություններ: Նրանցից մեկը դատական ակտերի կատարման ծառայության աշխատակից է:
