ԵՐԵՎԱՆ, 7 հունիսի — Sputnik. Թուրքիայի արտգործնախարար Մևլութ Չավուշօղլուն հայտարարել է, որ քայլեր կձեռնարկի Հայոց ցեղասպանության բանաձևի դեմ, որն ընդունել է Գերմանիայի Բունդեսթագը։ Այս մասին հայտնում է ՌԻԱ Նովոստին` հղում անելով Ռոյթերս գործակալությանը։
Արտգործնախարարի խոսքով` Թուրքիան այս իրավիճակում չի կարող լռել։
Բունդեսթագի պատգամավորները Հայոց ցեղասպանության վերաբերյալ բանաձևն ընդունեցին հունիսի 2-ին։ «Հայերի և մյուս քրիստոնյա փոքրամասնությունների նկատմամբ իրականացված ցեղասպանության հիշատակի և ոգեկոչման մասին» բանաձևին կողմ քվեարկեց խորհրդարանականների գերակշիռ մեծամասնությունը:
Բունդեսթագի բանաձևի ընդունմանը հաջորդեց այն, որ Թուրքիան հետ կանչեց Գերմանիայում առաքելություն իրականացնող իր դեսպանին:
Թուրքիայի նախագահն էլ հայտարարեց, որ գերմանական խորհրդարանի որոշումը լուրջ ազդեցություն կունենա Թուրքիայի և Գերմանիայի հարաբերությունների վրա:
