ԵՐԵՎԱՆ, 10 հունիսի-Sputnik, Անի Լիպարիտյան. Գերմանիայի հավաքականի ֆուտբոլիստները Եվրոպայի առաջնության բացման կապակցությամբ կստանան հուշամեդալների հավաքածու Հայաստանից։ Այդ մասին Sputnik Արմենիային ասաց Երևանի առաջին «Գնոմոն» ոսկերչական գործարանի գլխավոր տնօրեն Էմիլ Գրիգորյանը։
Մեդալների դարձերեսին պատկերված է այս կամ այն ֆուտբոլիստը, իսկ դիմերեսին` ընկերական շարժ։ Մեդալի վրա պատկերված է նաև Գերմանիայի հավաքականի մարզիչ Յոահիմ Լևը։
Դա, նրա խոսքով, արույրե հուշամեդալների հավաքածու է` նվիրված 2014թ.-ին աշխարհի առաջնությունում ֆուտբոլի Գերմանիայի հավաքականի հաղթանակին։ 2018թ.-ի հաջորդ առաջնությունը տեղի կունենա Ռուսաստանում։
«Գաղափարի հեղինակն է նկարիչ և քանդակագործ Հարություն Չալիկյանը։ Եվ երբ պետք էր մեկնել Բեռլինի World Money Fair2015 ցուցահանդես, նա եկավ մեզ հետ։ Չալիկյանը կարողանում է ակնթարթորեն ընկալել մարդու բնավորությունը և զգացմունքները և արտահայտել դրանք թղթի վրա։ Դա տևում է 3-5 րոպե»,- ասաց Գրիգորյանը։
Բայց ամեն ինչ այդքան հեշտ չէր։ Հայկական պատվիրակությանը պետք էր հատուկ գաղափար` Գերմանիայում և Ռուսաստանում այցելուների սրտերը նվաճելու համար։
«Սկզբից մենք ցանկանում էինք ստեղծել մեդալներ մեծ ութնյակի թեմայով, բայց ավելի ուշ որոշեցինք հրաժարվել քաղաքական գաղափարից։ Հայաստանն առաջին անգամ էր ելույթ ունենում նման երկրների շարքում, ինչպիսիք են Անգլիան, Գերմանիան, Ֆրանսիան, Ավստրալիան։ Մենք որոշեցինք չկատակել այդ թեմայով և օգտագործել ֆուտբոլային թեման, առավել ևս, որ Գերմանիայի հավաքականը ներկա չեմպիոնն է»,- պարզաբանեց Գրիգորյանը։
Հայ ոսկերիչները մտավախություն են ունեցել, որ այցելուները ոչ միանշանակ կամ բացասական կարձագանքեն, կարող են վիրավորվել։ Բայց գործարանի տնօրենի խոսքով` ամեն ինչ հաջող է անցել։
Սկզբից այցելուները չեն ճանաչել մեդալների վրա պատկերված հերոսներին, իսկ հետո, երբ հասկացել են` ովքեր են, ծիծաղել են և մեծ հաճույքով զննել մեդալները։
«Արդեն Գերմանիայում և Ռուսաստանում ցուցահանդեսից հետո մեզ ասացին, որ մեր գաղափարը նոր ուղղություն է համաշխարհային փորձում։ Մենք ողջ տարին աշխատել ենք, որպեսզի մեդալների հավաքածուն ուղարկենք ֆուտբոլիստներին, բայց շատ բարդ էր դա անելը։ Սակայն ամեն դեպքում մենք լուծումը գտանք` մեդալները կուղարկվեն Ֆրանսիայի ֆուտբոլի ֆեդերացիա, որը դրանք կհանձնի գերմանացի ֆուտբոլիստներին»,- նշեց Գրիգորյանը։
Sputnik Արմենիան կհետևի իրադարձությունների զարգացմանը։
