ԵՐԵՎԱՆ, 10 հունիսի-Sputnik. Ահաբեկիչները, որոնց որոնում են հունիսի 5-ին Ակտոբեում հարձակում իրականացնելու համար, զինված դիմադրություն են ցուցաբերել հակաահաբեկչական գործողության ընթացքում, հաղորդում է Նովոստի Ղազախստանը` հղում անելով Ղազախստանի Ազգային անվտանգության հանձնաժողովի կայքին։
Հունիսի 5-ին փոխհրաձգություն էր տեղի ունեցել Ղազախստանի Ակտոբե քաղաքի միանգամից երեք շրջաններում։ Անհայտ անձինք հարձակվել էին զենքի երկու խանութների և զորամասի վրա։ Հատուկ գործողության ընթացքում իրավապահ մարմինները սպանել են չորս հանցագործի, ևս յոթը ձերբակալվել է։ Երկուշաբթի առավոտյան իրավապահ մարմինները հաղորդել են, որ ոչնչացվել է ևս հինգ ծայրահեղական։ Ղազախստանի ՆԳՆ տվյալներով` հարձակումը կատարել է «ոչ ավանդական կրոնական արմատական հոսանքների» հարող խումբը։
«Ղազախստանի հակաահաբեկչական կենտրոնը տեղեկացնում է, որ հունիսի 10-ին ահաբեկչության դեմ պայքարի Ակտոբեի շրջանային օպերատիվ շտաբն անցկացնում է այն անձանց ձերբակալելու գործողություն, որոնք առնչություն են ունեցել Ակտոբե քաղաքում ահաբեկչական գործողություններին։ Հանձնվելու առաջարկին ահաբեկիչները պատասխանել են զինված դիմադրությամբ։ Միջոցառումները շարունակվում են, դրանց արդյունքները լրացուցիչ կհաղորդվեն»,- ասվում է հաղորդագրությունում։
Հաղորդագրությունում նշվում է, որ խաղաղ բնակչությանը գործողության ուժային փուլի ընթացքում ոչինչ չի սպառնում, անվտանգությունն ապահովված է։
