ԵՐԵՎԱՆ, 10 հունիսի — Sputnik. Հայաստանի ազգային հերոս Գարեգին Նժդեհին նացիստների հետ համեմատելը պատմության համար անշնորհակալ գործ է, Sputnik Արմենիային ասաց ՀՀ ԱԺ փոխխոսնակ Էդուարդ Շարմազանովը`մեկնաբանելով Ռուսաստանի ԱԳՆ ներկայացուցչի հայտարարությունը։
Ավելի վաղ ՌԴ ԱԳՆ պաշտոնական ներկայացուցիչ Մարիա Զախարովան հայտնել էր, որ Մոսկվային զարմացրել է Երևանում` Վերմախտի «Հայկական լեգեոնի» գեներալ Գարեգին Նժդեհի արձանի տեղադրումը։
«Գարեգին Նժդեհը հայ ազգային հերոս է, ինչպես և Ալեքսանդր Նևսկին ու Սուվորովն են եղբայրական Ռուսաստանի ազգային հերոսներ», — ասաց Շարմազանովը Sputnik Արմենիային։
Նրա խոսքով` Գարեգին Նժդեհը երբեք ֆաշիստների և նացիստների հետ որևէ մեկի դեմ չի կռվել։
«Նա պայքարում էր հայ ժողովրդի ազատության, հայկական պետականության, առաջին հերթին` մեր ժողովրդի բարեկեցիկ ապագայի համար։ Նժդեհի ու նացիստների միջև զուգահեռ անցկացնելը` պատմության համար անշնորհակալ գործ է։ Սա ես ասում եմ` որպես պատմաբան», — ընդգծեց Շարմազանովը։
Հայ ազգային հերոս Գարեգին Նժդեհի արձանի բացումը տեղի է ունեցել մայիսի 28-ին։
