Ադրինե Թորոսյան, Sputnik.
Վանաձորում այս ցեղատեսակի շներից մեկն էլ մշակույթի գործիչ Արմեն Ներսիսյանի խնամքի տակ է պահվում: Ընկերոջ նվերն է, սիրով է պահում և հայրենակիցներին կոչ է անում բակերում միայն հայկական գամփռ պահել:
«Հեռուստատեսությամբ միշտ լսում ենք, որ ասում են՝ գայլերը մտան, գայլերը հոշոտեցին, իսկ եթե գամփռ ունենան, գայլերը չեն հարձակվի և քոռուփոշման կգնան»,- ասում է Արմեն Ներսիսյանը:
Նրա խոսքով` հայկական գամփռը յուրահատուկ է թե՛ իր աչքերի արտահայտությամբ, թե՛ բնավորությամբ, թե՛ հանգստությամբ, թե՛ տիրոջ ու ընտանիքի նկատմամբ ունեցած հավատարմությամբ:
Նրա համար գամփռը հայկական մշակույթի մի մասնիկ է։
«Ոչ միայն մեր հայկական շները, այլև հայկական ձին, Ղարաբաղի ձին, Վանա կատուն, որը, ցավոք սրտի, այսօր հայտնվել է «սահմանից» այն կողմ, դրանք մեր հարստություններն են: Ամեն անգամ, երբ կորցնում ենք, հետո շատ մեծ դժվարությամբ ենք կարողանում ապացուցել, որ մեր մշակույթն է՝ մեր երաժշտությունը, մեր կարպետը, մեր գորգը, մեր դարբնի գործերը, որ հայկական են մեր կենդանիները, որ ժամանակին էլի գտնվել են իրենց մոտ: Եվ կրկին անգամ ուզում եմ մեր ժողովրդին կոչ անել, որ հավատարիմ մնանք մեր հայ արմատներին, մեր ինքնությանը, դողանք մեր ամեն մի քարի, ամեն մի թփի, ամեն մի հայ տեսակի վրա»:
Տեսանյութում հայկական գամփռերն են՝ իրենց յուրօրինակ բնավորություններով:
