ԵՐԵՎԱՆ, 26 հունիսի — Sputnik. Հռոմի պապի` Հայոց ցեղասպանության վերաբերյալ հայտարարության մեջ չկային այնպիսի խոսքեր, որոնք կարելի էր որպես խաչակրաց արշավի ոգի մեկնաբանել, Էջմիածնում լրագրողներին ասաց Հռոմի պապի խոսնակ մոնսինյոր Ֆեդերիկո Լոմբարդին։
Հռոմի Սրբազան Քահանայապետ Ֆրանցիսկոս պապը եռօրյա այցով Հայաստան էր ժամանել հունիսի 24-ին։ Հայաստան այցելած առաջին Պապը Հովհաննես Պողոս II-ն է եղել։ Նա հայ ժողովրդի բնօրրանում է եղել 2001 թվականի սեպտեմբերին։
«Եթե ինչ-որ մեկն ուշադիր լսում է Պապի ասածը կամ կարդում է նրա գրածը, ապա կտեսնի, որ այնտեղ ոչ մի բան չկա, որը կարող է մեկնաբանվել որպես խաչակրաց արշավի ոգի, մարտնչելու, պատերազմելու ոգի: Պապի իրական մտադրությունը ժողովուրդների միջև խաղաղության երկխոսության հիմքեր գցելն է»,- ասել է Լոմբարդին:
Նրա խոսքով` Պապն աղոթել է հանուն խաղաղության, ցանկություն հայտնել, որ հաշտություն լինի, նա որևէ խոսք չի արտաբերել թուրք ժողովրդի դեմ, խոսել է հաշտեցման ցանկության մասին, այդ թվում`թուրքերի ու հայերի հաշտեցման։
Թուրքիայի վարչապետ Նուրեդին Ջանիկլին Հռոմի պապի` Հայոց ցեղասպանության վերաբերյալ խոսքերը «խաչակիրների դիրքորոշման դրսևորում» է համարել։
XX դարի սկզբին Օսմանյան կայսրությունում ավելի քան 1.5 մլն հայ սպանվեց։ Թուրքիան ավանդաբար մերժում է հայերի մեղադրանքները ցեղասպանության իրագործման հարցում և այս հարցի վերաբերյալ քննադատությունն արևմուտքի կողմից բավական ցավագին է ընդունում։
Առաջինը Օսմանյան կայսրությունում Հայոց ցեղասպանությունը 1965 թվականին ճանաչեց Ուրուգվայը, որի օրինակին հետևեցին Ֆրանսիան, Իտալիան, Գերմանիան, Հոլանդիան, Բելգիան, Լեհաստանը, Լիտվան, Սլովակիան, Շվեդիան, Շվեյցարիան, Հունաստանը, Կիպրոսը, Լիբանանը, Կանադան, Վենեսուելան, Արգենտինան, Բրազիլիան, Չիլին, Վատիկանը, Բոլիվիան, Չեխիան, Ավստրիան, Լյուքսեմբուրգը։ ԱՄՆ 50 նահանգներից 44-ը պաշտոնապես ճանաչել և դատապարտել է Հայոց ցեղասպանությունը, ինչպես նաև ապրիլի 24-ը հայտարարել Հայոց ցեղասպանության զոհերի հիշատակի օր։
