ԵՐԵՎԱՆ, 27 հունիսի-Sputnik. Ուժի մեջ է մտել ԵՏՄ անդամ երկրների համար տրանսպորտային միջոցների էլեկտրոնային անձնագրերի միասնական համակարգ ներմուծելու մասին համաձայնագիրը, երկուշաբթի հաղորդվում է Եվրասիական տնտեսական հանձնաժողովի (ԵՏՀ) կայքում:
Էլեկտրոնային անձնագրերի անցնելու հետ կապված՝ միության պետություններում հունիսի 27-ից տրանսպորտային միջոցների սեփականատերերի համար զգալիորեն կհեշտացվեն ավտոմեքենաների տեղափոխման և առուվաճառքի հարցերը, կստեղծվի տրանսպորտային միջոցների, ինքնագնացների և տեխնիկայի այլ տեսակների տվյալների միասնական բազա:
Համաձայնագիրը տարածվում է ավտոմոբիլային, գյուղատնտեսական, ճանապարհաշինարարական և այլ տեխնիկայի վրա:
«Էլեկտրոնային անձնագրերի համակարգի կիրառումը թույլ կտա կարգավորել տեխնիկան շահագործման ենթարկելու թույլտվությունը, ապահովել հսկողության կազմակերպման ընդհանուր մոտեցումներ՝ թողարկվող արտադրանքի կառուցվածքի և տեխնիկական վիճակի վերաբերյալ միության տեխնիկական կանոնակարգի պահանջների համաձայն»,- ասվում է հաղորդագրությունում:
Էլեկտրոնային անձնագրերի համակարգերը հնարավորություն են տալիս տեղեկատվություն տրամադրել ավտոմեքենայի մասին դրա գոյության ողջ ընթացքում: Կարևոր է նաև այն, որ էլեկտրոնային անձնագիրն անհնար է կորցնել կամ փչացնել: Էլեկտրոնային անձնագրերի համակարգերում պահվող տեղատվությունն առավելագույն կերպով հասանելի կլինի վարորդների և առանձին լիազորված պետական կառույցների համար:
