ԵՐԵՎԱՆ, 27 հունիսի — Sputnik. Էրդողանի` Պուտինին գրած նամակից հետո ռուս-թուրքական հարաբերություններում որոշակի բարելավում կնկատվի: Նման կարծիք Sputnik Արմենիայի հետ զրույցում հայտնեց թուրքագետ Ռուբեն Սաֆրաստյանը:
Թուրքիան հասկացել է, որ եթե շարունակի իր ներկա քաղաքականությունը, կարող է հայտնվել մեկուսացման մեջ, մեկնաբանելով ՌԴ նախագահ Վլադիմիր Պուտինին գրած նամակն ու դրանում Պուտինից հայցած ներողությունը, ասաց արևելագետ-թուրքագետ Ռուբեն Սաֆրաստյանը:
Թուրքիայի նախագահ Ռեջեփ Թայիպ Էրդողանը նամակ է ուղարկել ՌԴ նախագահ Վլադիմիր Պուտինին, որտեղ ափսոսանք է հայտնել և ներողություն խնդրել անցած աշնանը կործանված ռուսական Սու-24 ինքնաթիռի համար: Այդ մասին հայտարարել է Ռուսաստանի նախագահի մամուլի քարտուղար Դմիտրի Պեսկովը։
«Թուրքիայի արկածախնդիր քաղաքականությունը, մասնավորապես Մերձավոր Արևելքում, Սիրիայում, հանգեցրել է նրան, որ նա կանգնած է աշխարհաքաղաքական պարտության եզրին: Եվ պատահական չէ, որ գրեթե միաժամանակ Թուրքիան քայլեր է ձեռնարկում և´ Ռուսաստանի հետ հարաբերությունները բարելավելու, և´ Իսրայելի»,- ասաց թուրքագետը:
Այդուհանդերձ, մեր զրուցակիցը կարծում է, որ Թուրքիայի` հաշտեցմանն ուղղված քայլը անսպասելի չէր, և Ռուսաստանն ինքն էլ նախապես քայլեր ձեռնարկել էր այդ ուղղությամբ, օրինակ` հրավիրելով Թուրքիայի ԱԳ նախարարին Սոչիում կայացած Սևծովյան երկրների հանդիպմանը:
«Վերջին շրջանում նման մեսիջներ գալիս էին երկու երկրներից էլ»,- ասում է Ռուբեն Սաֆրաստյանը` հավելելով, որ թե´ Ռուսաստանը և թե´ Թուրքիան փորձում էին ինչ-որ ուղիներ գտնել հարաբերությունները կարգավորելու համար:
«Երկու երկրները, բացի նրանից, որ ունեն որոշակի տնտեսական ընդհանուր շահեր և տնտեսական առումով շահագրգռված էին հարաբերությունները կարգավորելու, աշխարհաքաղաքական առումով շարունակում են մնալ հակառակորդներ։ Նրանց աշխարհաքաղաքական շահերը և´ Մերձավոր Արևելքում, և´ Հարավային Կովկասում տարբեր են»,-կարծում է Սաֆրաստյանը։
Այսպիսով` անկախ ներողություն հայցելուց ու նամակագրական կապով հարաբերությունները վերականգնելու ձգտումից, թուրքագետի համոզմամբ, Ռուսաստանի ու Թուրքիայի միջև քաղաքական մրցակցությունը դեռ երկար կպահպանվի: Իսկ ինչ վերաբերում է տնտեսական հարաբերություններին, այս ոլորտում որոշ չափով կվերականգնվի նախկին իրավիճակը:
