Մամուլի ասուլիսին կմասնակցեն`
Կազմկոմիտե`
«Ապագա» նախագծի համահիմնադիր Իրինա Չիբուխչյանը,
Նկարիչ-դիզայներ, ռեժիսոր և մուլտիպլիկատոր Աննա Քոլոզյանը,
Հոգեբան-մանկավարժ, ընտանեկան ստեղծագործական նախագծերի («Նռան հատիկ», «Այբ, Բեն, Գիմ» և այլն) հեղինակ Գայանե Աղայանը։
Փառատոնի գործընկերները`
«ԷյԹիՓի» բարեգործական հիմնադրամի հասարակայնության հետ
կապերի բաժնի ղեկավար Քրիստինե Հովսեփյանը,
Yell Extrim Park-ի վաճառքի մասնագետ Ջեմմա Թորգոմյանը։
Փառատոնի նպատակն է` հանրությանը ներկայացնել հայկական խոտաբույսերը, մասնավորապես, Տավուշի մարզի հարուստ բուսական աշխարհը` որպես երկրի ներկայիս քիչ հայտնի ռեսուրսներից մեկը։ Փառատոնի հայեցակարգը կարելի է ներկայացնել հետևյալ արտահայտությամբ. «Պահպանում ենք այն, ինչ սիրում ենք։ Սիրում ենք այն, ինչ մեզ հայտնի է»։
Փառատոնի կրթական բաղադրիչը համընկնում է նրա ժամանցային մասի հետ։ Փառատոնի վեց հարթակներում կանցկացվեն վարպետության դասեր` նվիրված խոտաբույսերից առօրյա իրերի պատրաստմանը, գորգագործությանը, արտ-օբյեկտներին և թատերական բեմադրություններին, երեխաների և մեծահասակների համար մեծ սենսորային ուղուն։ Կազմկոմիտեն փառատոնի հիմնական նպատակներից մեկն է համարում Տավուշի մարզի բնակիչների, այդ թվում` նաև հեռավոր գյուղերի բնակիչների մասնակցությունը։
Այս տարի միջոցառման շրջանակներում կանցկացվի ֆանտաստիկ միջոցառում` տարբեր երկրներում արտադրված պանրից և հայկական կանաչեղենից լավաշով փաթաթված ամենամեծ «բրդուճը» կպատրաստվի։ Փառատոնի հյուրերը կկարողանան նկարիչ-կենսաբան Թամար Գալստյանի ստեղծած հայկական խոտաբույսերի լուսանկարներով բացիկ ուղարկել։ Փոստային բաժանմունքն աշխատելու է HayBuis փառատոնի հարթակներից մեկում։ Հնարավոր կլինի լուսանկարվել ծաղիկներից պատրաստված հանդերձանքով, կլինեն մեծահասակների և երեխաների համար սենսորային ճանապարհ, Տերյան մշակութային կենտրոնի կողմից բուսական նախշազարդերով հայկական ավանդական տարազների ցուցադրություն։ Նույն օրը «Yell Park»-ում տեղի կունենա նաև «Rope Road» ճոպանուղու բացումը։
