ԵՐԵՎԱՆ, 29 հունիսի — Sputnik. Հռոմի Ֆրանցիսկոս պապը տեսանյութ է հրապարակել Հայաստան կատարած այցի մասին Instagram-ի իր էջում։
Տեսանյութում լուսանկարների միջոցով ներկայացված են Ֆրանցիսկոս պապի Հայաստան կատարած այցի ուշագրավ դրվագները։
Հռոմի պապի Հայաստան այցի երեք օրվա ընթացքում պապին ընդունեց Հայաստանի նախագահ Սերժ Սարգսյանը։ Ֆրանցիսկոս պապն այցելեց Ծիծեռնակաբերդ և վարդեր խոնարհեց Հայոց ցեղասպանության զոհերի հուշահամալիրում, այցելեց Գյումրի և լատինական ծեսով պատարագ մատուցեց:
Ֆրանցիսկոս պապն ու Ամենայն հայոց կաթողիկոսը էկումենիկ արարողություն կատարեցին Երևանի Հանրապետության հրապարակում։
Այցի վերջին օրը պապը Մայր Աթոռ Սուրբ Էջմիածնում մասնակցեց կիրակնօրյա պատարագի, որը մատուցեց Գարեգին Բ կաթողիկոսը։ Պապը նաև այցելեց Խոր Վիրապ։
