ԵՐԵՎԱՆ, 4 հուլիսի — Sputnik. Երևանում հուլիսի 4-ին կայացած ՀԱՊԿ արտգործնախարարների խորհրդի ավարտին հայտարարություն է ընդունվել այն մասին, որ Վիեննայի և Սանկտ Պետերբուրգի գագաթնաժողովներում ընդունված պայմանավորվածությունները պետք է պահպանվեն։ Այս մասին հայտնում է ՀՀ արտգործնախարարության մամուլի ծառայությունը։
Փաստաթղթի համաձայն` ձեռք բերված պայմանավորվածություններն ուղղված են «հակամարտության գոտում իրավիճակի սրացումը կանխելուն, իրավիճակի կայունացմանը և խաղաղ գործընթացի առաջխաղացման համար պայմաններ ստեղծելուն»։
«Լեռնային Ղարաբաղի հակամարտության բացառապես խաղաղ կարգավորման անհրաժեշտությունը հաստատելով` մենք աջակցություն ենք հայտնում հակամարտության կարգավորման հարցերով զբաղվող ԵԱՀԿ ՄԽ համանախագահների` հակամարտությունը ՄԱԿ-ի կանոնադրության, հելսինկյան Վերջնական ակտի դրույթներին համապատասխան կարգավորելու ջանքերին, որոնք մասնավորապես վերաբերում են ուժի կամ ուժի սպառնալիքի չգործածմանը, պետության տարածքային ամբողջականությանը, ժողովուրդների հավասարությանը և իր ճակատագրի տնօրինման իրավունքին»- գրված է հայտարարության տեքստում։
Ղարաբաղյան հակամարտությունը սրվեց ապրիլի 2-5–ն ընկած ժամանակահատվածում։ Երևանը հայտարարեց, որ Ադրբեջանը նախահարձակ գործողություններ է սկսել, Բաքուն էլ իր հերթին հայտարարեց, որ հայկական կողմն է կրակում Ադրբեջանի ուղղությամբ։ Պաշտոնական տվյալների համաձայն` հակամարտության երկու կողմն էլ զոհեր ունեցան, այդ թվում` խաղաղ բնակիչների շրջանում։
Ապրիլի 5-ին Մոսկվայի աջակցությամբ կողմերը պայմանավորվեցին դադարեցնել ռազմական գործողությունները, սակայն շփման գծում խախտումները շարունակվում են մինչ օրս։ Մայիսի 16-ին Վիեննայում կայացավ Հայաստանի և Ադրբեջանի նախագահներ Սերժ Սարգսյանի և Իլհամ Ալիևի` հակամարտության թեժացումից հետո առաջին հանդիպումը, որին մասնակցեցին նաև ԵԱՀԿ Մինսկի խմբի համանախագահները։
Սարգսյան-Ալիև հանդիպմանը համանախագահող երկրների ներկայացուցիչները պնդեցին 1994թ.–ի զինադադարի և 1995թ.–ի զինադադարի ամրապնդման մասին համաձայնագրերի անշեղ իրագործման անհրաժեշտությունը: Համաձայնություն ձեռք բերվեց քայլեր ձեռնարկել դրանց իրականացման մշտադիտարկման և միջադեպերի հետաքննության մեխանիզմի ներդրման, ԵԱՀԿ գործող նախագահի անձնական ներկայացուցչի թիմի կարողությունների ավելացման, հակամարտության կարգավորման բանակցային գործընթացի հնարավոր վերսկսման ուղղությամբ։
