ԵՐԵՎԱՆ, 6 հուլիսի-Sputnik. Թուրքիայում բնակվող հայ լուսանկարիչ Արա Գյուլերի Ստմաբուլի տունը կվերածվի պատկերասրահի և կդառնա Թուրքիայի մշակութային կենտրոններից մեկը, հաղորդում է Ermenihaber.am-ը` հղում անելով Murekkephaber լրատվական պորտալին։
Միջազգային պատկերասրահում կցուցադրվեն Գյուլերի լուսանկարները, ինչպես նաև նյութեր նրա կյանքի և ստեղծագործության մասին, այդ թվում` գրքեր, հուշեր, հուշանվերներ, պարգևներ, պաստառներ, հավաքածուներ և անձնական իրեր։
Նախագծի հեղինակն է «Doğuş Grup» հայտնի թուրքական ընկերությունը, որը ձեռք է բերել լուսանկարչի հետ համագործակցելու իրավունքը։ Ընկերության գործադիր տնօրենի խոսքով` թանգարանի նպատակն է պահպանել ֆոտոլրագրողի արխիվը և փոխանցել այն գալիք սերունդներին։
Արա Գյուլերը ծնվել է 1928թ.-ի օգոստոսի 16-ին Ստամբուլի Բեյօղլու շրջանում, հայկական ընտանիքում։ Նա համարվում է 20-րդ դարի խոշոր լուսանկարիչներից մեկը: Լուսանկարչության պատմության մեջ նա մտել է «Ստամբուլի աչք» անունով: Հայ լուսանկարչի հազվագյուտ ֆոտոարխիվն ընդգրկում է հին ու նոր Թուրքիայի պատմությունը, համաշխարհային ճանաչում ունեցող քաղաքական գործիչների, արվեստագետների, կինոդերասանների, հայ մեծերի դիմանկարներ:
