ԵՐԵՎԱՆ, 11 հուլիսի — Sputnik. Հայաստանի նախագահ Սերժ Սարգսյանը երկուշաբթի Արգենտինայի Անկախության օրվա առթիվ այցելել է Հայաստանում Արգենտինայի դեսպանություն, հայտնում են ՀՀ նախագահի մամուլի ծառայությունից։
Հանրապետության նախագահը երկրի անկախության 200-ամյակի առթիվ շնորհավորել է դեսպան Գոնսալո Ուռիոլաբեիտիային, դեսպանության ողջ անձնակազմին և Արգենտինայի ամբողջ ժողովրդին՝ մաղթելով բարեկամ Արգենտինային հետագա բարգավաճում, նորանոր հաջողություններ, իսկ դեսպան Ուռիոլաբեիտիային՝ զգալի ձեռքբերումներ հայ-արգենտինյան հարաբերությունների ամրապնդման գործում:
Նախագահը համոզմունք է հայտնել, որ ամենատարբեր ոլորտներում առաջընթացին ուղղված երկրի ղեկավարության գործուն քայլերի շնորհիվ Արգենտինան կշարունակի իր նշանակալի դերակատարումն ունենալ թե՛ տարածաշրջանային և թե՛ միջազգային գործընթացներում:
«Համոզված եմ` փոխադարձ վստահության վրա հիմնված մեր միջպետական հարաբերությունները վերընթաց զարգացում կապրեն՝ արձանագրելով երկկողմ գործակցությունն առավել խորացնող և ամրապնդող ձեռքբերումներ»,- ընդգծել է ՀՀ նախագահը։
Սարգսյանը վստահեցրել է, որ Հայաստանը պատրաստակամ է անել ամեն հնարավորը՝ հայ-արգենտինյան հարաբերությունները որակապես նոր մակարդակի բարձրացնելու համար:
Սերժ Սարգսյանը գոհունակությամբ է նշել, որ Հայաստանի և Արգենտինայի միջև սերտ համագործակցությունն արտացոլվում է նաև միմյանց համար կենսական նշանակություն ունեցող հարցերի նկատմամբ առանձնակի վերաբերմունքով: Այդ համատեքստում նախագահը բարձր է գնահատել Արգենտինայի անկողմնակալ դիրքորոշումը ղարաբաղյան հակամարտության հարցում, ինչպես նաև Հայոց ցեղասպանության միջազգային ճանաչման ու դատապարտման գործում Արգենտինայի իշխանությունների ու ժողովրդի ծանրակշիռ ավանդը:
ՀՀ նախագահը և Արգենտինայի դեսպանը երկկողմ հարաբերությունների դինամիկ զարգացման գործում կարևորել են ակտիվ քաղաքական երկխոսությունն ու բարձր մակարդակի փոխայցելությունները: Զրուցակիցների համոզմամբ` հայ-արգենտինյան ամուր բարեկամության մասին է խոսում նաև այն հանգամանքը, որ Հայաստանը և Արգենտինան միմյանց մայրաքաղաքներում տարածաշրջանային առաջին դեսպանություններն են բացել:
Դեսպան Գոնսալո Ուռիոլաբեիտիան միջպետական հարաբերությունների զարգացման հարցում առանձնակի կարևորել է արգենտինահայ համայնքի դերը:
«Մեր ժողովուրդների միջև հարաբերությունները շատ ավելի երկար պատմություն ունեն, քան մեր երկրների միջև դիվանագիտական հարաբերությունների հաստատման ժամանակահատվածն է: Հայ ժողովրդի համար պատմական իրողություններով պայմանավորված ծանր ժամանակաշրջանում, երբ ժողովրդի մի հատված ապաստան գտավ Արգենտինայում, կարողացավ կարճ ժամանակում դրսևորվել իր դրական կողմերով, մեծ հարգանքի արժանանալ և ինտեգրվել արգենտինյան հասարակությանն ու ներդրում ունենալ երկրի զարգացման գործում»,- նշել է Հայաստանում Արգենտինայի դեսպանը:
