ԵՐԵՎԱՆ, 11 հուլիսի — Sputnik. Չնայած Ալիևի հայտարարություններին` ՆԱՏՕ-ն չէ այն հարթակը, որտեղ պետք է քննարկվի ԼՂ հիմնահարցի կարգավորումը. դրա համար կա մասնագիտացված կառույց, կարգավորման գործընթացն այլ հարթակ տեղափոխելու փորձերն ընդունելի չեն և հակասում են ԵԱՀԿ ՄԽ համանախագահների հայտարարություններին։ Այս մասին հայտարարեց Էդուարդ Շարմազանովը։
Նրա մեկնաբանությամբ` սա ՆԱՏՕ-ի գագաթնաժողովի շրջանակներում ՀՀ նախագահ Սերժ Սարգսյանի ելույթում հնչած 3 հիմնական ուղերձներից մեկն է։
Ինչ վերաբերում է ՆԱՏՕ-ի հետ ՀՀ հետագա համագործակցությանը, ԱԺ փոխխոսնակը նշեց, որ Հայաստանը շարունակելու է իր համագործակցությունն այդ կառույցի հետ ներկայիս մակարդակով, բայց նրա հիմնական տեղը ՀԱՊԿ-ում է։
«Մեր տարածաշրջանում ՆԱՏՕ-ի հիմնական խաղացողը Թուրքիան է, ես կարծում եմ, որ Հայաստանն անելիք չունի մի ռազմաքաղաքական բլոկում, որտեղ Թուրքիան է»,- ասաց նա։
Նախագահի ելույթի հաջորդ ուղերձն, ըստ Շարմազանովի` այն է, որ ՀՀ-ն ու ԼՂՀ-ն, հակամարտության բացառապես խաղաղ լուծման կողմնակից են, իսկ պատերազմի սպառնալիքները գալիս են Ադրբեջանից ու Թուրքիայից։
Երրորդ ուղերձով Սերժ Սարգսյանը նշեց, որ Ադրբեջանը պետք է ճանաչի Արցախի ժողովրդի ինքնորոշման իրավունքը։ Նաև այս հանգամանքը կարևորեց
Շարմազանովը։
«Մեզ ձեռնտու չէ ստատուս քվոն. այն պետք է փոխվի, բայց դրա հիմնական խոչընդոտողն Ադրբեջանն է, որը մերժում է Արցախի ժողովրդի ինքնորոշման իրավունքը։ Այսինքն, պետք է վերացնել այս կոնֆլիկտի ոչ թե հետևանքները, այլ պատճառները։ Իսկ պատճառն այն է, որ Ադրբեջանը մշտապես մերժել ու մերժում է ճանաչել Արցախի ժողովրդի ինքնորոշման իրավունքի իրացումը»,- ասաց Շարմազանովը։
Այս ենթատեքստում, Շարմազանովի համոզմամբ` Սերժ Սարգսյանի ելույթում հնչած հիմնական ուղերձն այն է, որ Հայաստանի համար «թիվ մեկ խնդիրը ոչ թե տարածքների կամ փախստականների, այլ նախ և առաջ Արցախի կարգավիճակի ու Արցախի ժողովրդի ինքնորոշման իրավունքի խնդիրն է»։
Շարմազանովի դիտարկմամբ` Արցախի ժողովուրդն ի՛նքը պիտի որոշի` մնալ Ադրբեջանի կազմում, միանալ Հայաստանին, թե՞ լինել անկախ։
