ԵՐԵՎԱՆ, 18 հուլիսի — Sputnik. Ազատության հրապարակում հանրային քննարկումը սկսվեց մեկ րոպե լռությամբ` ի հիշատակ զինված խմբի կողմից ոստիկանության գնդի գրոհի ժամանակ զոհված ոստիկանի։
Քննարկման մասնակիցներն առաջարկեցին, որ մարդկանց մի մասը մնա տեղում, մյուսները շարժվեն դեպի Էրեբունի` գրավված ոստիկանության ՊՊԾ գնդի մոտ։ Մարդիկ սկսեցին քննարկել առաջարկը, սակայն սկսվեց քաշքշուկ ցուցարարների և ոստիկանների միջև, ինչից հետո ոստիկանները սկսեցին մարդկանց ցրել։ Հավաքվածներից մի քանիսին մտցրեցին ոստիկանական մեքենաները։
Մարդիկ վրդովված` սկսեցին շարժվել դեպի Էրեբունի, սակայն ոստիկանները խոչընդոտում էին նրանց ճանապարհը։
Այնտեղ գտնվող փոխոստիկանապետ Հունան Պողոսյանը իրեն շրջապատած մարդկանց ասաց, որ ոստիկանությունն ամեն ինչ անում է, որ բախումներ և արյունահեղություն թույլ չտա, իրավիճակը հսկողության տակ է, գնում են բանակցություններ, և պետք չէ կրքեր բորբոքել։
Նրա խոսքով` այս պահի դրությամբ որևէ միջոցառում ծրագրված չէ, հավաքվածների անխոհեմ քայլերը հետևանքներ կարող են ունենալ։
Նա դեպի Հյուսիսային պողոտա շարժված մարդկանց առաջարկեց գնալ Ազատության հրապարակ և այնտեղ շարունակել հանրահավաք, սակայն չգնալ Էրեբունի, ու երաշխավորեց, որ ոստիկանները նրանց չեն անհանգստացնի։
Ցուցարարները վերադարձան Ազատության հրապարակ և այժմ փորձում են բանակցել ոստիկանության հետ։
Հուլիսի 17-ի առավոտյան մի խումբ զինված անձինք մուտք են գործել ՀՀ ոստիկանության պարեկապահակային ծառայության գնդի տարածք։ Նրանք պատանդ են վերցրել ոստիկանության ծառայողների՝ նրանց ազատման դիմաց պահանջելով ազատ արձակել Ժիրայր Սեֆիլյանին, նաև պահանջում են Հայաստանի իշխանությունների հրաժարականը։
