ԵՐԵՎԱՆ, 19 հուլիսի-Sputnik. Սարի թաղի բնակիչները հիշում են մութ ու ցուրտ 90-ականները, երբ չկար էլեկտրականություն և ջեռուցում, Sputnik Արմենիայի թղթակցին ասաց այդ թաղամասի բնակիչներից մեկը, որը չցանկացավ հայտնել անունը։
«Արդեն երրորդ օրն է՝ ապրում ենք առանց հոսանքի, գազի և ջրի։ Աշխատանքի կամ որևէ տեղ գնալու համար իջնում ենք քաղաքի կենտրոն, ոտքով երկար ճանապարհ անցնում, որպեսզի օգտվենք հասարակական տրանսպորտից», — պատմեց մեր զրուցակիցը։
Նրա խոսքով` սարիթաղցիներին ասել են, որ այդ միջոցները ձեռնարկվել են անվտանգության նկատառումներից ելնելով, որպեսզի այդ շրջանում լարվածությունը չհանգեցնի վթարային իրավիճակների, մասնավորապես՝ կապված գազամատակարարման հետ։
Սարիթաղցիները բողոքում են ստեղծված վիճակից, ասելով, որ իրենք կատարյալ շրջափակման մեջ են։
