ԵՐԵՎԱՆ, 20 հուլիսի — Sputnik. Հուլիսի 19-ին ոստիկանների նկատմամբ կիրառված բռնությունների փաստով հարուցված քրեական գործի շրջանակներում ձերբակալվել է Երևանի բնակիչ, 1978թ. ծնված Հ. Թորոսյանը, հայտնում են ՀՀ Քննչական կոմիտեից։
Քննչական կոմիտեի տարածած հաղորդագրության մեջ ասվում է, որ ձերբակալվածը կասկածվում է ՀՀ քրեական օրենսգրքի 316-րդ հոդվածի 2-րդ մասի հատկանիշներով նախատեսված արարք կատարելու մեջ, այն է՝ իշխանության ներկայացուցչի նկատմամբ առողջության համար վտանգավոր բռնություն՝ կապված նրանց կողմից իրենց ծառայողական պարտականությունները կատարելու հետ:
Հիշեցնենք, հուլիսի 19-ին` ժամը 20-ի սահմաններում, Երևանի Մ. Խորենացու փողոցին հարող Գլինկայի և Որմնադիրների փողոցների հատման վայրում ոստիկանների նկատմամբ կիրառված բռնության հիմքով ՀՀ Քննչական կոմիտեում հարուցվել էր քրեական գործ: Նյութերի նախապատրաստման ընթացքում իրավապահները պարզել էին, որ մի խումբ անձինք բռնություն են գործադրել իրենց ծառայողական պարտականությունները կատարող ոստիկանության ծառայողների նկատմամբ՝ նրանց ուղղությամբ քարեր և այլ կոշտ առարկաներ նետելով:
Կիրառված բռնությունների հետևանքով տարբեր մարմնական վնասվածքներով բուժօգնության է տեղափոխվել ոստիկանության 6 աշխատակից։ 6 ոստիկանները ճանաչվել են տուժող և հարցաքննվել։
