ԵՐԵՎԱՆ, 21 հուլիսի — Sputnik. Հայաստանի հանրապետական կուսակցության խոսնակ Էդուարդ Շարմազանովը կուսակցության գերագույն մարմնի նիստից հետո ներկայացրեց ՀՀԿ տեսակետը Երևանի վերջին օրերի իրադարձությունների մասին։
«Տեղի է ունեցել ողբերգություն, մենք կորցրել ենք մեր ժողովրդի պաշտպաններից մեկին, մարդ, որը ծառայել է հայրենիքին և՛ արցախյան պատերազմի ժամանակ, և այժմ իր ծառայողական պարտականությունները կատարելիս»,- ասաց Շարմազանովը՝ ցավակցություն հայտնելով զոհված գնդապետ Արթուր Վանոյանի ընտանիքին։
Նա նշեց, որ Հայաստանի ուժային կառույցները և՛ երեկ, և՛ այսօր, և՛ դրանից առաջ հիմնականում ունեցել են մեկ նպատակ՝ առանց արյունահեղության, բանակցությունների ճանապարհով հասնել այս դժվար իրավիճակի հանգուցալուծմանը:
Էդուարդ Շարմազանովն, առանց լրագրողների հարցերին սպասելու, ինքը պատասխանեց այն հարցին, թե ինչու հանրապետականներն այս օրերին լրատվամիջոցների միջոցով չեն ներկայացրել ՀՀԿ տեսակետը:
«Մեր և կոնկրետ իմ լռությունը պայմանավորված է եղել խաղաղ բանակցությունները չխոչընդոտելու ցանկությամբ»,- ասաց նա՝ հույս հայտնելով, որ «կհաղթի քրիստոնեական բանականությունը, հանդուրժողականությունը, և հնարավոր կլինի խուսափել նոր արյունահեղությունից»։
Լրագրողների հարցին, թե ինչու իշխանությունը չի արձագանքում «Սասնա ծռեր» խմբի պահանջներին, Շարմազանովն ասաց.
«Բանակցություններն ընթանում են, պետք է բոլոր մեխանիզմներն օգտագործենք, որպեսզի նոր արյունահեղություն չլինի: Պահանջների մասին ժամանակը չէ խոսելու, այսօր խնդիրը բանակցելն է։ Հայաստանում կա իշխանություն, և ԱԱԾ-ն պարբերաբար պաշտոնական հայտարարություններ է արել։ ԱԱԾ-ն իշխանության մասն է»։
Ասուլիսի ավարտին Շարմազանովը խոստացավ, որ իշխանությունն անելու է հնարավոր բոլոր քայլերը, որպեսզի հայի արյուն այլևս չթափվի:
Հուլիսի 17-ի առավոտյան մի խումբ զինված անձինք մուտք են գործել ՀՀ ոստիկանության պարեկապահակային ծառայության գնդի տարածք։ Նրանք պատանդ են վերցրել ոստիկանության ծառայողների՝ նրանց ազատման դիմաց պահանջելով ազատ արձակել Ժիրայր Սեֆիլյանին, նաև պահանջում են Հայաստանի իշխանությունների հրաժարականը։ ՀՀ իրավապահ մարմինների աշխատակիցները բանակցում են զինված խնբի անդամների հետ։
