ԵՐԵՎԱՆ, 23 հուլիսի — Sputnik. ՀՀ Ազգային անվտանգության ծառայության Մամուլի կենտրոնի ղեկավար Սամսոն Գալստյանին Tert.am-ը խնդրել է մեկնաբանել Ոստիկանության պարեկապահակային ծառայության գունդը գրաված «Սասնա ծռեր» խմբի հետ վարվող բանակցությունների ընթացքն այս պահին, հայտնել են ԱԱԾ-ից։
«Բանակցային գործընթացը շարունակվում է: Քննարկվում են դեռևս որպես պատանդ մնացած ոստիկանների ազատ արձակման, ինչպես նաև վերջին օրերին բանակցությունների առարկա հանդիսացող այլ հարցեր: Փաստում եմ, որ այսօր զինված խմբի անդամները կամովին ազատ են արձակել երկու պատանդ ոստիկանների: Այլ տեղեկատվություն այս պահին բանակցային գործընթացի շահերից ելնելով չեմ կարող հրապարակել»,- ասված է հաղորդագրությունում:
Հիշեցնենք, որ «Սասնա ծռեր» խմբի անդամները հանդիպել են ԱԱԾ տնօրեն Գեորգի Կուտոյանի հետ, և որոշում է կայացվել ազատ արձակել պատանդներին՝ պայմանով, որ ստեղծվելու է մամուլի կետ։ Ոստիկանության վերջին երկու պատանդները` ՀՀ փոխոստիկանապետը և Երևանի փոխոստիկանապետը, ազատ կարձակվեն մամուլի կետի ստեղծման ժամանակ։
