ԵՐԵՎԱՆ, 28 հուլիսի — Sputnik. Բժիշկներին պատանդ վերցնելն աննախադեպ երևույթ է, համաշխարհային պրակտիկայում նման դեպք չի եղել, Sputnik Արմենիայի թղթակցի հետ զրույցում ասաց ՀՀ գլխավոր թոքաբան Անդրանիկ Ոսկանյանը։
Երկրի գլխավոր թոքաբանը զինված խմբին հորդորեց բաց թողնել իր գործընկերներին։
«Եթե խմբի անդամների մեջ վիրավորներ կան, պատանդ վերցված բժիշկները ոչնչով չեն կարող օգնել նրանց։ Վիրավորները պետք է հոսպիտալացվեն և համապատասխան բուժզննում անցնեն», — ասել է Ոսկանյանը։
Նա ստեղծված քաղաքական իրավիճակը համեմատեց ալերգիայի հետ` նշելով, որ «դա անպայման բարի վերջ կունենա, որովհետև ալերգիան երկար չի կարող տևել. դա հիվանդություն չէ»։
Ոսկանյանի կարծիքով` զինված խմբի անդամները բժիշկների հետ արդար չեն վարվել, քանի որ բժիշկները, անկախ ամեն ինչից, համաձայնել էին առաջին բուժօգնություն ցուցաբերել։ Ստեղծված իրավիճակից դուրս գալու միակ ճանապարհը թոքաբանը համարում է բժիշկներին ազատ արձակելը, ինչպես նաև իշխանության կողմից իրավիճակի հանգուցալուծմանն ուղղված կոնկրետ քայլեր ձեռնարկելը։
Նրա խոսքով` բժիշկներին պահելը ոչ թե ինչ-որ նորմի խախտում է, այլ` այլանդակություն:
«Դա ոչ մի նորմայի մեջ չի տեղավորում, որովհետև բժիշկը քաղաքական գործիչ չէ և այնտեղ չի գնացել չգիտեմ ինչ նպատակի համար, նա գնացել է օգնություն ցուցաբերելու, և բռնել են ու չեն թողնում»,- ասաց Ոսկանյանը։
Ոստիկանության պարեկապահակային գնդի տարածք ահազանգով մեկնած շտապօգնության բրիգադի անդամները «Սասնա ծռեր» խմբի անդամների կողմից պատանդ էին պահվել հուլիսի 26-ի լույս 27-ի գիշերը: Անձնակազմի 4 անդամներից մեկը՝ բուժակ Դավիթ Տոնոյանը, ազատ է արձակվել:
