ԵՐԵՎԱՆ, 4 օգոստոսի — Sputnik. «Հիմնադիր խորհրդարանի» անդամ Ժիրայր Սեֆիլյանի եղբայրը՝ Թորոս Սեֆիլյանը, իր ֆեյսբուքյան էջում գրել է, որ «Սասնա ծռեր» խմբի անդամ Գևորգ Մելքոնյանին ազատ են արձակել՝ քաղաքից չբացակայելու ստորագրությամբ։
Գևորգ Մելքոնյանին զինված խմբի մեկ այլ անդամի՝ Ռուբեն Գրիգորյանի հետ, ոստիկանները դուրս էին բերել գրավված ՊՊԾ գնդից։
Հուլիսի 17-ին ոստիկանության պարեկապահակային ծառայության գունդը գրաված «Սասնա ծռեր» զինված խումբը հանձնվեց 15 օր անց։
Այդ ընթացքում տեղի ունեցան զինված ընդհարումներ խմբի և ոստիկանների միջև, նաև բախումներ եղան «Սասնա ծռերին» սատարող ցուցարարների և ոստիկանության միջև, տուժեցին նաև լրագրողները։
«Սասնա ծռեր» խմբի բոլոր անդամները կալանավորվել են։
Բոլորին առաջադրվել է նույն մեղադրանքը՝ ՀՀ Քր.օր.-ի 218 հոդվածի 3-րդ մասի առաջին կետով (պատանդ վերցնելը) և 235 հոդվածի երրորդ մասով (ապօրինի զենք զինամթերք ձեռք բերել, իրացնել, պահել, փոխադրել):
Նույն մեղադրանքն է առաջադրվել նաև «Սասնա ծռերին» հաց տանող Արթուր Սարգսյանի նկատմամբ։ Հարուցված քրեական գործով ձերբակալվել կամ կալանավորվել էր 47 անձ:
