ԵՐԵՎԱՆ, 6 օգոստոսի — Sputnik. Հայաստանի օլիմպիական հավաքականը առաջին անգամ օլիմպիական խաղերին մասնակցում է 33 մարզիկով, որից երեքն այսօր արդեն պայքարի մեջ կմտնեն օլիմպիական մեդալի համար:
Մարմնամարզության մրցումներում Հայաստանը ներկայացված է լինելու 36 տարվա ընդմիջումից հետո:
Հարություն Մերդինյանը մրցելու է նժույգաթափերի մրցումներում, իսկ Արթուր Դավթյանը մեդալի համար կպայքարի հենացատկերում:
Մարմնամարզության Հայաստանի ազգային հավաքականի գլխավոր մարզիչ Հակոբ Սերոբյանը օլիմպիական մրցաշարը սպասարկելու է որպես մրցավար, սակայն նա ուշադրությամբ հետևում է մեր մարզիկների նախապատրաստությանը:
-Պարոն Սերոբյան, տեղեկություն ստացանք այն մասին, որ Հարություն Մերդինյանը թեթև մրսածություն ունի: Արդյո՞ք դա չի խանգարի նրա ելույթին:
— Այո, նման խնդիր կա: Հարությունը շատ լավ պատրաստված ժամանել է Ռիո ու օլիմպիական իր ծրագիրը շատ լավ էր կատարում: Ստուգողական ելույթի ժամանակ ես նկատեցի, որ ինչ-որ բան այն չէ։ Պարզվեց, որ թեթև մրսածություն կա, բայց հիմա արդեն բժիշկներն ասում են, որ մարմնամարզիկը վերականգնվում է: Ամեն ինչ արվում է Մերդինյանի առողջական վիճակը կարգավորելու համար, մենք էլ ամեն ինչ կանենք հաջող ելույթ ունենալու համար:
-Հարությունը Եվրոպայի առաջնությունում ապացուցեց, որ կարող է հաղթել բոլորին: Այդ արդյունքին օլիմպիական խաղերում հասնելու համար մեր մարզիկին ի՞նչ է հարկավոր:
— Առաջին հերթին Հարությունը պետք է ցուցադրի այն ամենը, ինչի ունակ է: Ավելի պարզ ասեմ, պետք է նախապատրաստած վարժությունը կատարի և վերջ: Եթե Մերդինյանը կատարի այն վարժությունը, որը կատարել է ուսումնամարզական հավաքների ժամանակ, ապա ես համոզված եմ, որ բարձր գնահատական կստանա ու կմասնակցի եզրափակչին:
-Ընդհանուր առմամբ, քանի՞ մարմնամարզիկ է մասնակցում մրցումներին:
— Մասնակիցների թիվը 98 է, նրանցից առնվազն 70-ը հանդես կգա նժույգաթափերի վրա նախնական մրցումների ժամանակ: Այդ մրցումների ընթացքում լավագույն գնահատական ստացած ութ մարմնամարզիկներ դուրս կգան եզրափակիչ, որտեղ էլ կվիճարկեն օլիմպիական չեմպիոնի կոչումը: Եզրափակիչները կայանալու են նժույգաթափերի մրցումներում օգոստոսի 14-ին, իսկ հենացատկերում՝ օգոստոսի 15-ին: Հիմա մեզ համար կարևորը այսօրվա մրցումներն են, և ես հուսով եմ, որ մեր տղաները կհայտնվեն եզրափակչում:
