ԵՐԵՎԱՆ, 10 օգոստոսի — Sputnik. Ռուսաստանի սպորտային մարմնամարզության կանանց հավաքականը Ռիո դե Ժանեյրոյի օլիմպիադայում արծաթե մեդալ նվաճեց թիմային հաշվարկում։ Հավաքականի համար արծաթ նվաճեցին հինգ մարմնամարզուհիներ, այդ թվում` Սեդա Թութխալյանը։
Թութխալյանն իր առաջին ազատ ծրագիրը ներկայացրեց Արա Գևորգյանի «Արցախ» ստեղծագործության ներքո։
Տարբեր բարձրության զուգափայտերի վարժությունում ռուսաստանցի մարմնամարզուհիներ Անգելինա Մելնիկովան, Դարյա Սպիրիդոնովան և Ալիա Մուստաֆինան վաստակեցին 46,166 միավոր։ Մելնիկովան, Մուստաֆինան և Թութխալյանն այնուհետև հավասարակշռության գերանի վարժությունների շնորհիվ ունեցան 42,757 միավոր, ազատ ոճի վարժություններից հետո Մելնիկովան, Թութխալյանն ու Մուստաֆինան նվաճեցին 42,032 միավոր, իսկ հենացատկում ռուս մարմնամարզուհիները (Մելնիկովա, Մուստաֆինա, Մարիա Պասեկա) վաստակեցին 45,733 միավոր։
Ոսկե մեդալ նվաճեց ԱՄՆ-ի հավաքականը, որը թիմային հաշվարկով վաստակեց 184,897 միավոր, երկրորդը Ռուսաստանն էր` 176,688 միավորով և երրորդը Չինաստանը` 176,003 միավորով։
Մարմնամարզուհիների նվաճած արծաթը Ռիոյում Ռուսաստանի հավաքականի 12-րդ մեդալն էր։ Երկուշաբթի ռուս մարմնամարզության տղամարդկանց հավաքականը ևս արծաթե մեդալ էր նվաճել։
