ԵՐԵՎԱՆ, 13 օգոստոսի-Sputnik. Ադրբեջանական լրատվամիջոցները Նախիջևանի սահմանը հատած տղամարդու տարբեր անուններ են գրում՝ մեկ Հենրիխ Ագետյան, մեկ էլ՝ Հենրիկ Ագեցյան:
Իսկ <<Արմենպրես>> լրատվական գործակալությանը հաջողվել է ճշտել սահմանը հատած տղամարդու իրական անուն-ազգանունը: Նա Արարատի մարզի Այգեպատ գյուղի բնակիչ Հենրիկ Սարիբեկի Աղեկյանն է: Ծնվել է 1954 թվականին:
ՀՀ գերիների, պատանդների և անհայտ կորածների հարցերով զբաղվող հանձնաժողովի աշխատանքային խմբի ղեկավար Արմեն Կապրիելյանը հայտնել է, որ տղամարդը հոգեկան խնդիրներ է ունեցել, նախկինում ևս փորձեր է արել հատել հայ-ադրբեջանական սահմանը: Ամեն անգամ հայկական կողմը կանխել է այդ գործողությունը:
<<Ճշտումներ են կատարվում, թե նա ինչ հանգամանքներում է անհետ կորել: Ադրբեջանական կողմում հայտնվելու մասին տեղեկատվության ստացումից հետո մենք անմիջապես սկսում ենք բանակցային պրոցեսը, պահանջում ենք, որ մեր քաղաքացուն վերադարձնեն: Հույս ունենք, որ դա տեղի կունենա ողջամիտ ժամկետներում: Չեմ կարծում, որ գործընթացը կձգձգվի, քանի որ հոգեկան խանգարումներ ունեցող անձանց Ադրբեջանը քաղաքական շահարկումների համար չի կարող օգտագործել: Նման մարդիկ հաշվետու չեն իրենց արածների համար, չեն էլ գիտակցում, թե որ ուղղությամբ են գնում>>,-ասել է Կապրիելյանը:
Կանխատեսվում է, որ ամբողջ գործընթացը կարող է տևել մի քանի օրից մինչև մի քանի շաբաթ:
