ԵՐԵՎԱՆ, 16 օգոստոսի — Sputnik. Ղարաբաղյան հակամարտությունը վերջնականապես կարգավորելու համար հակամարտող կողմերը պետք է քաղաքական կամք դրսևորեն, ՌԻԱ Նովոստիին է հայտնել ԵԱՀԿ ՄԽ ամերիկացի համանախագահ Ջեյմս Ուորլիքը։
Նրա խոսքով` Հայաստանի և Ադրբեջանի նախագահներ Սերժ Սարգսյանի և Իլհամ Ալիևի` Վիեննայում և Սանկտ Պետերբուրգում կայացած հանդիպումները «նոր շունչ հաղորդեցին հակամարտության կարգավորման բանակցային գործընթացին»։
«Կարևորն այն է, որ նախագահները հակամարտությունը բացառապես խաղաղ ճանապարհով լուծելու պատրաստակամություն հայտնեցին։ Բացի այդ, ակտիվորեն քննարկվել են հարցեր, որոնք կկարողանան վերականգնել խաղաղությունը», — ասել է Ուորլիքը։
«Մենք շարունակում ենք լավատես լինել ու հավատում ենք, որ այս տարի ևս համանախագահները բարձրաստիճան պաշտոնյաների աջակցությամբ կշարունակեն իրենց աշխատանքը հակամարտության կարգավորման մեջ առաջընթաց արձանագրելու համար։ Վերջին հաշվով, հակամարտության խաղաղ և վերջնական կարգավորումը կապված է երկու կողմի դրսևորած քաղաքական կամքից», — հայտնել է ԵԱՀԿ ՄԽ ամերիկացի համանախագահը։
Ղարաբաղյան հակամարտությունը սրվեց ապրիլի 2-5–ն ընկած ժամանակահատվածում։ Երևանը հայտարարեց, որ Ադրբեջանը նախահարձակ գործողություններ է սկսել, Բաքուն էլ իր հերթին հայտարարեց, որ հայկական կողմն է կրակում Ադրբեջանի ուղղությամբ։ Պաշտոնական տվյալների համաձայն` հակամարտության երկու կողմն էլ զոհեր ունեցան, այդ թվում` խաղաղ բնակիչների շրջանում։
Ապրիլի 5-ին Մոսկվայի աջակցությամբ կողմերը պայմանավորվեցին դադարեցնել ռազմական գործողությունները, սակայն շփման գծում խախտումները շարունակվում են մինչ օրս։ Մայիսի 16-ին Վիեննայում կայացավ Հայաստանի և Ադրբեջանի նախագահներ Սերժ Սարգսյանի և Իլհամ Ալիևի` հակամարտության թեժացումից հետո առաջին հանդիպումը, որին մասնակցեցին նաև ԵԱՀԿ Մինսկի խմբի համանախագահները։
Սարգսյան-Ալիև հանդիպմանը համանախագահող երկրների ներկայացուցիչները պնդեցին 1994թ.–ի զինադադարի և 1995թ.–ի զինադադարի ամրապնդման մասին համաձայնագրերի անշեղ իրագործման անհրաժեշտությունը: Համաձայնություն ձեռք բերվեց քայլեր ձեռնարկել դրանց իրականացման մշտադիտարկման և միջադեպերի հետաքննության մեխանիզմի ներդրման, ԵԱՀԿ գործող նախագահի անձնական ներկայացուցչի թիմի կարողությունների ավելացման, հակամարտության կարգավորման բանակցային գործընթացի հնարավոր վերսկսման ուղղությամբ։
