ԵՐԵՎԱՆ, 18 օգոստոսի — Sputnik. Changе.org կայքում տեղադրված պահանջագրի տակ արդեն ավելի քան 9 հազար մարդ է ստորագրել։
Պահանջագրի հեղինակները նշում են, որ Միհրան Հարությունյանն օլիմպիական չեմպիոնի կոչումից զրկվել է մրցավարների անարդար գնահատականի պատճառով։
«Սա խայտառակություն է հունահռոմեական ըմբշամարտի համար։ Աշխարհը տեսավ, թե իրականում ով դարձավ օլիմպիական չեմպիոն»,- նշված է փաստաթղթում։
Պահանջագրի հեղինակները միջազգային ֆեդերացիաներին ու Ըմբշամարտի միացյալ ոճերի միջազգային ֆեդերացիային հորդորում են վերականգնել արդարությունը։
«Ցանկացած անարդարություն ստվեր է նետում օլիմպիական խաղերի վրա։ 31-րդ օլիմպիական խաղերի կազմակերպիչները նույնպես պետք է միանան այս պահանջագրին և արդարության վերականգնմանն ուղղված քայլեր ձեռնարկեն»,- նշված է պահանջագրում։
Հիշեցնենք, որ 66 գ քաշային կարգում հանդես եկող Միհրան Հարությունյանը մրցապայքարի եզրափակիչ փուլում մրցում էր սերբ Դավոր Շտեֆանեկի հետ։ Պայքարն ավարտվեց 1։1 հաշվով, սակայն մրցավարները հաղթանակը շնորհեցին սերբ մարզիկին։
