ԵՐԵՎԱՆ, 19 օգոստոսի — Sputnik. Մխիթարյանը սուպերֆուտբոլիստ է և այս մրցաշրջանում մեծ օգուտ է բերելու մեր թիմին, այս մասին ասել է «Մանչեսթեր Յունայթեդի» գլխավոր մարզիչ Ժոզե Մոուրինյոն, ասված է «Մանչեսթեր Յունայթեդի» կայքում:
«Մանչեսթեր Յունայթեդ» — «Սաութհեմփթոն» անգլիական Պրեմիեր լիգայի երկրորդ տուրի հանդիպմանը նախորդած ասուլիսում լրագրողները պորտուգալացի մասնագետին հարցրել են, թե ինչու է թիմի նորեկ Հենրիխ Մխիթարյանը ստանում այդքան քիչ խաղային ժամանակ:
««Լեսթերի» դեմ Սուպերգավաթի խաղում ինձ հարկավոր էր Ջեսի Լինգարդի արագությունը, իսկ «Բորնմութի» դեմ մրցավեճում Խուան Մատան ավելի օգտակար կլիներ մրցակցի բարձր պրեսինգի պայմաններում: Ես գտա, որ այդ խաղերում նրանց դաշտ դուրս գալը կլինի ավելի ճիշտ, և որ Ռունին պետք է հանդես գա Իբրահիմովիչի թիկունքում: Ես այն մարզիչներից չեմ, որոնք նոր ֆուտբոլիստ ձեռք բերելուց հետո փորձում են ամեն կերպ պաշտպանել և արդարացնել իրենց ընտրությունը: Եվս մեկ անգամ կրկնեմ, որ Մխիթարյանը սուպերֆուտբոլիստ է, և այս մրցաշրջանում մեծ օգուտ է բերելու մեր թիմին»,- Ժոզե Մոուրինյոյի խոսքը մեջբերում է կայքը:
Հայաստանի հավաքականի կիսապաշտպանը նախորդ հանգստյան օրերին էր նորամուտը նշել Պրեմիեր լիգայում՝ փոխարինման դուրս գալով «Բորնմութի» դեմ հաղթական խաղի (3:1) 75-րդ րոպեին:
