ԵՐԵՎԱՆ, 20 օգոստոսի — Sputnik. Հայաստանը ներկայացնող Գառնիկ Մնացականյանին շատ բարդ վիճակահանություն էր բաժին ընկել. Ռահիմիի կատարած հնարքը, որն ըմբշամարտի լեզվով խաչ է կոչվում, հնարավորություն է տալիս 2 միավոր վաստակել ամեն գլորումի ժամանակ։
Այս քաշային կարգում անակնկալ կերպով աշխարհի չեմպիոն և մեդալակիր Հասան Ռահիմին զիջեց ճապոնացի Ռեյ Հիգուչիին։ 20-ամյա ճապոնացուն ոչ ոք չէր ճանաչում, սակայն նա դուրս եկավ ոսկե եզրափակիչ։ Մինչ եզրափակիչը այս քաշային կարգի չեմպիոն, Վրաստանը ներկայացնող Վլադիմիր Խինչեգաշվիլին Sputnik Արմենիայի թղթակցի հետ զրույցում ասաց, որ կգոտեմարտի ճապոնացու հետ ու այդ ժամանակ էլ պարզ կդառնա թե նա ով է․ «Բարդ մրցակից է երևում»։
Այս օրերի ամենահավասար, սակայն անպասելի եզրափակիչներից մեկը 57 կգ քաշային կարգում էր։ Լոնդոնի օլիմպիական խաղերի արծաթե մեդալակիր, աշխարհի գործող չեմպիոն, աշխարհի և Եվրոպայի առաջնությունների հաղթող և մրցանակակիր 25-ամյա ըմբիշը գրեթե իր բոլոր մրցակիցներին հաղթեց հավասար պայքարում՝ միավորների չնչին տարբերությամբ։ Հատկապես դիտարժան էր ադրբեջանցի Հաջի Ալիևի հետ գոտեմարտը, որտեղ վրացի ըմբիշի մարզիչը բողոքարկեց մրցավարական որոշումը դեռ առաջին մրցափուլում, ինչը կրճատեց հաշվի տարբերությունը։
Երկրորդ մրցափուլում գոտեմարտի վերջին վայրկյաններին ադրբեջանցի մարզիչը բողոքարկեց որոշումը, սակայն հաջողության չհասավ։ Այդպիսով` կիսաեզրափակչի գոտեմարտն ավարտվեց 5-3։
Եզրափակիչ փուլում ճապոնացի ըմբիշի հետ գոտեմարտն ընթացավ հավասար պայքարում։ Սկզբում վրացի ըմբիշը զիջեց 3 միավոր, այնուհետև կարողացավ հետ բերել 2-ը։ Գոտեմարտի վերջում ճապոնացի ըմբիշին տրվեց 30 վայրկյան հնարք կատարելու և միավոր վաստակելու համար, քանի որ վերջինս պասիվ էր, սակայն ոչինչ անել չհաջողվեց։ Ճապոնացի ըմբիշի մարզիչները բողոքարկեցին մրցավարական որոշումը, սակայն հաջողության չհասան։ Արդյունքում Խինչեգաշվիլին 4-3 հաշվով հաղթանակ տոնեց Հիգուչիի նկատմամբ և դարձավ Օլիմիական չեմպիոն։
Հաղթական գոտեմարտից հետո Խինչեգաշվիլին Sputnik
Արմենիային ասաց, որ ճապոնացի մարզիկը շատ ուժեղ էր, ավելի ուժեղ, քան ինքն էր պատկերացնում, ու հիմա շատ գոհ է, որ հաղթել է ու ոսկե մեդալ շահել։
