ԵՐԵՎԱՆ, 25 օգոստոսի — Sputnik, Նաիրա Պողոսյան. Հայաստանում Իրանի Իսլամական Հանրապետության արտակարգ և լիազոր դեսպան Սեյեդ Քազեմ Սաջադին հայ-իրանական հարաբերությունները Sputnik Արմենիային ներկայացրեց նախ՝ որպես դարավոր բարեկամների միություն, հետո նոր միայն՝ քաղաքական, տնտեսական ու մշակութային գործընկերություն։
Դեսպանի հետ մեր հանդիպման նպատակը Իրան-Հայաստան հարաբերությունների հեռանկարն էր՝ տարածաշրջանային զարգացումների ֆոնին, երկու երկրների միջև վիզայի ռեժիմի վերացման պայմանում։
«Մենք միշտ կողք կողքի ենք, դժվար պահերին աջակցում ենք միմյանց։ Հիմա, երբ Հայաստանը Եվրասիական տնտեսական միության անդամ է, լավ հեռանկարներ են բացվում Ռուսաստան-Հայաստան-Իրան տնտեսական կապերի զարգացման համար»,- ասաց դեսպանը։
Նա նշեց, որ Իրանը զարգացնում է հարաբերությունները Ռուսաստանի հետ, տարածաշրջանում նոր, շատ համարձակ ծրագրեր են իրականացվում։ Այդ համատեքստում երբեք որևէ սահմանափակում չկա ու չի եղել Հայաստանի համար՝ ներգրավվելու գործընթացներին։ Հայկական կողմն է որոշում՝ որ գործարքին ինչպես մասնակցի։
Դեսպանը բարեկամաբար է արտահայտվում թե՛ Ռուսաստանի, թե՛ Հայաստանի մասին, հիշեցնում, որ դժվար օրերին միշտ իր քրիստոնյա հարևանի կողքն է եղել ու վկայակոչում է բազմաթիվ ծրագրեր, այդ թվում ՝ գազ էլեկտրաէներգիայի դիմաց բարտերային նախագծերը, որոնք կյանքի են կոչվում՝ երկուստեք տնտեսական աճ ապահովելով։
Իրանի դեսպանատուն մեր այցի ժամանակ դիվանագետները հայ և իրանցի տուրօպերատորների հետ քննարկում էին համատեղ գործունեության հեռանկարները ազատ տնտեսական գոտու ստեղծման պայմաններում։
«Առանց մուտքի արտոնագրի մեր երկրներ ելումուտն ավելի դյուրին կլինի։ Վիզայի ռեժիմի վերացումը հեթական դրական քայլն է երկու պետությունների հարաբերություններում, ուստի հայկական ու իրանական տուպօպերատորների հետ համատեղ քննարկելու խնդիրներ կան, անհրաժեշտ է վերանայել հնարավորությունները, զբոսաշրջությունն առավել գրավիչ դարձնել երկուստեք»,- նկատեց դեսպան Սաջադը։
Զրույցի ընթացքում դեսպանը միշտ խոսում էր հայերի ու իրանցիների դարավոր, ջերմ բարեկամության մասին, ասում, որ Իրանում շատ հարգանքով են վերաբերվում հայերին և օգնում՝ պահպանելու հայկականը։
Վերջում նա ասաց, որ չի բացառվում՝ շուտով Հայաստան այցելի ԻԻՀ նախագահը։
«Հանուն Աստծո»,- իր խոսքն ավարտեց մեր դարավոր հարևանը։
