Ջերմուկ առողջարանային քաղաքը Հայաստանի ամենագեղատեսիլ հանգստավայրերից մեկն է։ Այն հարուստ է ոչ միայն տաք հանքային աղբյուրներով, այլև տեսարժան վայրերի մասին լեգենդներով։ Ջերմուկ հասնելուն պես որոշեցինք կանգ առնել Կեչուտի ջրամբարի մոտ։
Երբ 1970-ական թվականներին Սևանը բնապահպանական աղետի առաջ հայտնվեց, որոշվեց պահպանել ջրի մակարդակը։ Հենց այդ ժամանակ էլ փորվեց 50 կմ երկարությամբ Արփա-Սևան ստորգետնյա թունելը։
Արփա գետի վրա է գտնվում Կեչուտի հիասքանչ ջրամբարը, որը վստահորեն կարելի է հրաշք անվանել։ Այն ներդաշնակորեն ձուլվում է Ջերմուկի բնությանը։
Ջուրը ստորգետնյա թունել է լցվում ծաղկանման անցքերով։ Ջրի մեծ հոսքերը միաժամանակ հիացմունք և վախ են առաջացնում։ Այստեղ հատուկ կամուրջ կա և դիտահարթակ։
«Ջրահարսի վարսերը»
Ջերմուկի ջրվեժը նման ռոմանտիկ անուն ունի։ Ի դեպ, այն իր պատմությունն ունի։ Լեգենդի համաձայն` չքնաղ արքայադուստրը սիրահարվել է սովորական հովվի տղային։ Իմանալով այդ մասին` նրա հայրը` թագավորը, արգելել է հանդիպել տղայի հետ։ Աղջիկը չի լսել հորը, նա ամեն գիշեր երկար պարան է նետել կիրճի մեջ, որպեսզի սիրելին բարձրանա իր մոտ։ Այդ ժամանակ հայրը բարկացել և անիծել է աղջկան, որից հետո արքայադուստրը ջրահարս է դարձել։
Ջուրն այստեղ շատ սառն է, նույնիսկ այն դեպքում, երբ օդի ջերմաստիճանը 30 աստիճանից բարձր է։ Ջրվեժի բարձրությունը մոտ 70 մետր է։ Հայտնի է, որ ջուրն օժտված է բուժիչ հատկություններով։ Մարդկանց դուր է գալիս մոտենալ ջրին, խմել և զգուշորեն մտնել ջրի մեջ, բայց ամենակարևորը հաջող կադր «որսալն» է։
Հաջորդ կանգառը` ճոպանուղի
Այնուհետև մենք շարժվեցինք դեպի ճոպանուղի, որը կառուցվել է 2007թ-ի վերջին։ Այն կարող է տեղափոխել միանգամից 200 մարդու։
Շիշ լեռան բարձրությունը, որի վրայով անցնում է ճոպանուղին, կազմում է 2850 մետր, ամբարձիչ սարքը բարձրանում է մինչև 2450 մետր։ Լեռան վրա գտնվում է 1400 մետր երկարությամբ երկու ուղի սկսնակ դահուկորդների համար, իսկ 1300 մետր երկարությամբ ուղին նախատեսված է ավելի փորձառու դահուկորդների համար։ Բարձրությունների տարբերությունը կազմում է 400 մետր։ Ինչ-որ մեկին այն սարսափելի կթվա, իսկ ինչ-որ մեկը կարող է նույնիսկ ննջել։
Աշխատողներից մեկը` 14-ամյա պատանին, ձիով է բարձրանում Շիշ լեռան գագաթը։
Վերադարձիր, եղնիկ
Եվ վերջապես մենք հասանք եղնիկի քանդակին։ Հենց այդ կենդանին է Ջերմուկի և համանուն հանքային ջրի խորհրդանիշը։ Դեպի մետաղական խորհրդանիշ տանող ճանապարհը բարդ էր ու քարքարոտ, բայց մենք հաղթահարեցինք այն։
Եղնիկի հետ կապված նույնպես լեգենդ կա։ Մի անգամ որսորդը գնացել է անտառ և նկատելով եղնիկին` ցանկացել է կրակել նրա վրա, սակայն եղնիկի հայրը փրկել է նրան` ծածկելով իր մարմնով և ծանր վիրավորվել։
Եղնիկը և նրա մայրը կարողացել են տանել կենդանուն Ջերմուկի ջրերի մոտ։ Խմելով այն`եղնիկն ապաքինվել է։ Դրանից հետո եղնիկը դարձել է Ջերմուկի խորհրդանիշը։
Այս անգամ մենք չհասանք Ջերմուկի տաք աղբյուրներին, բայց այս պատմությունը շարունակելի է…
