ԵՐԵՎԱՆ, 5 սեպտեմբերի — Sputnik. Աշխարհի 65 երկրից Հայաստան ժամանած կառավարական ու միջազգային կազմակերպությունների պատվիրակությունների անդամներին մեր երկրում առավելապես հետաքրքրում է, թե ինչով են սնվում հայաստանյան դպրոցների աշակերտները:
Երեխաների սնուցման համաշխարհային 18-րդ ֆորումն այս տարի առաջին անգամ է կազմակերպվել Հայաստանում և տարածաշրջանում:
Մեր երկրում այսօր դպրոցական անվճար սնունդ է ստանում 1-3 դասարանի 83 000 աշակերտ: Դպրոցական սննդի զարգացման ծրագիրը Հայաստանում իրականացվում է 2010թ-ից և ընդգրկում է հայաստանյան բոլոր դպրոցները, բացառությամբ Երևան քաղաքի: Հանրապետության 10 մարզերից 7-ում ծրագիրը ֆինանսավորում են միջազգային դոնորները, 3-ում՝ Արարատում, Վայոց Ձորում, Սյունիքում, իսկ հաջորդ տարվանից նաև՝ Տավուշի մարզում՝ ՀՀ կառավարությունը:
«ՀՀ կառավարության համար դպրոցական սննդի կազմակերպումը առաջնահերթությունների շարքում է: Մենք հետևողականորեն և աստիճանաբար ստանձնում ենք ծրագրի պատասխանատվությունը՝ լրացնելով նաև մեր գործընկերների՝ ՄԱԿ-ի պարենի համաշխարհային ծրագրի և ՌԴ ճյուղային ծրագրի ինստիտուտի նախորդ տարիներին կուտակած փորձն ու գիտելիքները»,- ֆորումի բացման պաշտոնական արարողությանը հայտարարեց ՀՀ վարչապետ Հովիկ Աբրահամյանը:
Ծրագրի շարունակականությունն ապահովելու նպատակով կառավարությունը, Հովիկ Աբրահամյանի խոսքով, նախատեսում է ընդունել ոլորտը կարգավորող մի շարք որոշումներ ու կատարելագործել օրենսդրական դաշտը:
ՀՀ կրթության և գիտության նախարար Լևոն Մկրտչյանն էլ հայտնեց, որ կառավարությունը մտադիր է Հայաստանում դպրոցական սննդի հարցերով զբաղվող հատուկ հիմնադրամ ստեղծել:
«Այդ հիմնադրամի օգնությամբ հույս ունենք դոնորների ավելի նպատակաուղղված շարժում սկսել, որպեսզի կարողանանք արագացնել գործընթացը, քանի որ առայժմ խոսում ենք 3+1 մարզի մասին, բայց ծրագիրն արագացնելու կարիք ունենք: Ֆինանսական միջոցները բյուջեում շատ սուղ են, պիտի փորձենք այդ հիմնադրամի միջոցով առավել մեծ ծախսերի կարիքները հոգալ՝ շենքային պայմաններ, սառնարանային սարքավորումների տեղադրում, սպասարկում: Այս կարգի վերափոխումների համար դոնորների կարիքը շատ ունենք»,- ասաց Լևոն Մկրտչյանը:
ԿԳ նախարարի հայտնած տեղեկություններով` Հայաստանում յուրաքանչյուր դպրոցականի մեկ օրվա սննդի ծախսը 147 դրամ է, իսկ դպրոցի կահավորման ու համապատասխան տեխնիկական ապահովման ծախսը սկսվում է մի քանի 1000 դոլարից:
Բացի սոցիալական ու առողջապահական կարևոր նշանակությունից, դպրոցական սննդի ծրագիրը նաև մարզային դպրոցների համար վարկանիշային խնդիր է լուծում: Երեխաների սնուցման համաշխարհային հիմնադրամի նախագահ Ջեն Ուայթի գնահատմամբ` թե՛ ծնողները և թե՛ երեխաներն ավելի շահագրգռված են հատկապես այն դպրոցներ հաճախել, որտեղ անվճար սնունդ է տրամադրվում:
Իսկ դպրոցական սննդի ամենահաջող համաշխարհային փորձն ունեն ԱՄՆ-ն, Չիլին, Բրազիլիան: Այդ երկրներում, Ջեն Ուայթի խոսքով, դպրոցներին է մատակարարվում տեղացի ֆերմերների արտադրած էկոլոգիապես մաքուր արտադրանքը, ինչը թույլ է տալիս արտադրողին տեղում իրացնել իր արտադրանքը, իսկ դպրոցականներին՝ ապահովել ամենաթարմ սննդամթերքով:
Ֆորումի առաջիկա օրերի աշխատանքի ընթացքում հայ մասնագետներին ներկայացվելու է հատկապես համաշխարհային լավագույն փորձը՝ այն Հայաստանում տեղայնացնելու ակնկալիքով: Իսկ արտասահմանցի հյուրերն այս օրերին կայցելեն ՀՀ մարզային դպրոցներ` տեղում տեսնելու համար, թե ինչ պայմաններում և ինչ սնունդ է տրամադրվում հայ դպրոցականներին:
