ԵՐԵՎԱՆ, 15 սեպտեմբերի — Sputnik. Վարչապետից նկատողություն ստացած առաջին նախարարը տնտեսության պատասխանատուն էր` Արծվիկ Մինասյանը։ Նա ներկայացրեց, որ ԵՏՄ անդամակցության շրջանակում երկիրը, տնտեսության այս կամ այն ոլորտը հայտարարելով որպես գերակա, կարող է մաքսային արտոնություններ տալ այդ ոլորտում աշխատող ընկերություններին։ Սա այն դեպքում, եթե ներմուծվող ապրանքը կամ հումքը չի արտադրվում ԵՏՄ տարածքում, բայց կարևոր է տնտեսության առաջընթացի համար։ Այս անգամ արտոնություն ստացողը թեթև արդյունաբերությամբ զբաղվող մի ընկերություն էր։
Կարապետյան — Ինչքա՞ն է աշխատել ընկերությունը, մինչև արտոնություն է ստացել։
Մինասյան —Մոտ մեկ շաբաթ։
Կարապետյան — Չեմ հավատում։
Մինասյան — Լրացուցիչ կտեղեկացնեմ Ձեզ։
Կարապետյան — Չգիտե՞ք։ Ինչու՞, պարոն Մինասյան, բիզնեսին աջակցող կառույց եք, պիտի նրանց ձեռքը բռնած առաջ գնաք, որ իրենց ապահով զգան, որ որևէ մեկը չխոչընդոտի, 1 միլիոն 500 հազար դրամ արտոնություն է խնդրում։ Պետք է դասակարգենք ու կանոնակարգենք այնպես, որ բյուրոկրատիան վերացնենք, կա խաղի կանոն։
Հաջորդ դիտողության հասցեատերը ՀՀ մշակույթի նախարարի պաշտոնակատար Հասմիկ Պողոսյանն էր։ Նա ներկայացրեց Պատմամշակութային հուշարձանների պահպանության, օգտագործման և հանրահռչակման 2016-20 թթ. ռազմավարությունը և դրա իրականացումն ապահովող միջոցառումների շարքը։ Վարչապետի պարզ թվացող հարցին` արդյո՞ք այդ ընթացակարգերը նախկինում չկային, Պողոսյանը երկար-բարակ պատասխան տվեց։ Վարչապետն ընդհատեց նրան ու ասաց.
«Ես զեկուցողներին առաջարկում եմ զեկույցը մաքսիմալ լակոնիկ ձևակերպել, եթե հնարավոր է»։
Կառավարության նիստից հետո լրագրողների հետ խոսեց ՀՀ սպորտի և երիտասարդության նախարարի պաշտոնակատար Գաբրիել Ղազարյանը։ Հարցին, թե արդյոք նա վարչապետից դիտողություն չի՞ ստացել, Ղազարյանը, պատասխանեց, որ դեռ 2 օր է, ինչ Կարեն Կարապետյանը վարչապետ է, իրենք դեռ չեն շփվել։
