ԵՐԵՎԱՆ, 18 սեպտեմբերի — Sputnik. Առավոտյան ժամերին Հայաստանում Ռուսաստանի դեսպանատան տարածքում գործող ընտրատեղամասում քվեարկել է մոտ 100 մարդ, Sputnik Արմենիայի թղթակցին հայտնել է դեսպանատան հյուպատոսական բաժնի ղեկավար, տեղամասային ընտրական հանձնաժողովի նախագահ Պյոտր Շյուկինը:
Նա հայտնեց, որ Հայաստանի տարածքում բացվել է վեց ընտրատեղամաս, որոնք տեղակայված են Երևանում և Գյումրիում: Երկու ընտրատեղամասերում կարող են քվեարկել Հայաստանում մշտական բնակություն հաստատած Ռուսաստանի քաղաքացիները և ռուս զբոսաշրջիկները:
Եվս չորս տեղամաս բացվելէ ռուսական ռազմակայանի տարածքում, որտեղ իրենց քաղաքացիական պարտքն են կատարում ռուս զինծառայողները:
Շյուկինի խոսքով, դեռ ընտրողների հոսքն այդքան էլ մեծ չէ: Դա կապված է նրա հետ, որ այսօր հանգստյան օր է, սակայն, ինչպես ցույց է տալիս անցյալ ընտրարշավների փորձը, Հայաստանում Ռուսաստանի քաղաքացիները բավական ակտիվ են:
Այնպես որ, այսօր Ռուսաստանի դեսպանատան տեղամասում սպասում են մեծ թվով ընտրողների` 3-5 հազար հոգու:
Յոթերորդ գումարման Պետդումայի պատգամավորների ընտրությունները անցկացվում են խառը ընտրակարգով` 225 պատգամավոր կընտրվի կուսակցական ցուցակներով (համամասնական համակարգ) և 225-ը՝ միամանդատ օկրուգներով (մեծամասնական համակարգ): Դաշնային օկրուգով ընտրություններին գրանցվել է 14 կուսակցության ցուցակ:
ՀՀ տարածքում գործող ընտրատեղամասերը միացած են Նիժեգորոդսկու միամանդատ օկրուգին:
