ԵՐԵՎԱՆ, 20 սեպտեմբերի — Sputnik. Անդյան խորհրդարանը, որն Անդյան երկրների (Չիլի, Բոլիվիա, Պերու, Էկվադոր և Կոլումբիա) Համայնքի ղեկավար մարմինն է, միաձայն ընդունել է Հայոց ցեղասպանությունն ճանաչող բանաձև: Ինչպես հաղորդում է «Արմենպրես»-ը` վկայակոչելով Prensa Armenia-ն, խորհրդարանի նիստը տեղի է ունեցել սեպտեմբերի 17-ին Մոնտեվիդեոյում:
Բանաձևում ասվում է, որ 2016 թվականի ապրիլի 24-ին 101-րդ տարելիցն էր հայ ժողովրդի դեմ իրականացված ցեղասպանության, որն իրագործվել է 1915-1923 թվականներին Օսմանյան կայսրությունում և խլել 1,5 միլիոն մարդու կյանք:
Բանաձևը շեշտում է.
1. Դատապարտել տարբեր համայնքների և ժողովուրդների դեմ իրականացված միջազգային հանցագործությունները, մարդկության դեմ իրականացված հանցագործությունները, ցեղասպանությունը և ագրեսիայի հանցագործությունները,
2. Ճանաչել 1915-1923 թվականներին Օսմանյան կայսրության իշխանությունների կողմից ծրագրավորված Հայոց ցեղասպանությունը և համերաշխություն հայտնել հայ ժողովրդին և նրանց ժառանգներին (խմբ.- ցեղասպանության զոհերի), ովքեր ողջ աշխարհում կազմում են հայկական համայնքը: Դատապարտել ցանկացած ժխտողական քաղաքականություն` ուղղված Հայոց ցեղասպանությանը և հայ ժողովրդի հանդեպ իրականացված մարդկության դեմ հանցագործությանը:
3. Հորդորել միջազգային հանրությանը կիրառել ՄԱԿ-ի ընդունած սկզբունքը, որը ենթադրում է պաշտպանել քաղաքացիներին ցեղասպանություններից, մարդկության դեմ իրականացվող հանցագործություններից և մարդու իրավունքների ցանկացած կոպիտ խախտումներից, ձեռնարկել միջոցներ, որպեսզի հնարավոր լինի տարբեր համայնքներին, ժողովուրդներին ու ազգերին փրկել բռնության հետևանքով առաջացած տառապանքից:
Բանաձևը ենթադրում է հորդորել միջազգային հանրությանը ճանաչել հայ ժողովրդի ցեղասպանությունը որպես պատմական փաստ և աջակցել ճշմարտության ու արդարության փնտրտուքին:
1915 թվականին տեղի ունեցած ոճրագործությունը, որի հետևանքով Օսմանյան կայսրությունում ավելի քան 1.5 մլն հայ է սպանվել, ХХ դարի առաջին ցեղասպանությունն է համարվում։ Թուրքիան ավանդաբար մերժում է ցեղասպանություն իրագործելու մեղադրանքներն ու անչափ ցավագին է ընդունում այս հարցի վերաբերյալ քննադատությունները։
Հայոց ցեղասպանությունն առաջինը ճանաչել է Ուրուգվայը 1965 թվականին, այնուհետև նրա օրինակին են հետևել Ֆրանսիան, Իտալիան, Գերմանիան, Հոլանդիան, Բելգիան, Լեհաստանը, Լիտվան, Սլովակիան, Շվեդիան, Շվեյցարիան, Հունաստանը, Կիպրոսը, Լիբանանը, Կանադան, Վենեսուելան, Արգենտինան, Բրազիլիան, Չիլին, Վատիկանը, Բոլիվիան, Չեխիան, Ավստրիան, Լյուքսեմբուրգը։ ԱՄՆ 50 նահանգներից 44-ը պաշտոնապես ճանաչել և դատապարտել է Հայոց ցեղասպանությունը, ինչպես նաև ապրիլի 24-ը հայտարարել Հայոց ցեղասպանության զոհերի հիշատակի օր։
