ԵՐԵՎԱՆ, 25 սեպտեմբերի — Sputnik. Աշխարհի լավագույն դուդուկահարները ելույթ կունենան Դուդուկի միջազգային երրորդ փառատոնում, որն այսօր կմեկնարկի Մոսկվայում:
«Ռուսաստանի և ոչ միայն Ռուսաստանի տարբեր քաղաքներից ժամանած հանդիսատեսն ամեն տարի հավաքվում է Մոսկվայում՝ սիրված երաժիշտներին տեսնելու և հայկական դուդուկով վիրտուոզ կատարումներ լսելու համար: Դուդուկը բազմադարյա պատմություն ունեցող, հարուստ երաժշտական գործիք է, որ կարող է «քայլել» ժամանակին համընթաց և միաժամանակ չմոռանալ անցյալի մասին: 2005 թվականին հայկական դուդուկը ճանաչվել էր ՅՈՒՆԵՍԿՕ-ի Համաշխարհային ոչ նյութական մշակութային ժառանգության գլուխգործոց», — նշված է Ռուսաստանի հայ երիտասարդության կոնգրեսի հաղորդագրության մեջ:
Դուդուկի փառատոնի մասնակիցների թվում են Հայաստանի վաստակավոր արտիստ, դուդուկի նոր տեսակների հայտնագործող և ստեղծող Գեորգի Մինասովն ու նրա «Դուդուկներ» համույթը, Հայաստանի վաստակավոր արտիստ Գագիկ Մալխասյանը, Կոմիտասի ստեղծագործությունների լավագույն կատարող և Ջիվան Գասպարյանի անվան դուդուկահարների մրցույթի դափնեկիր Գեորգի Մինասյանը, բազմաթիիվ գործինքների վրա նվագող Վիտալի Պողոսյանն ու ուրիշներ:
Փառատոնին կմասնակցեն նաև «Ակունք» ժողգործիքների հայկական համույթն ու «Հայասա» պարային համույթը՝ Արփինե Ամիրյանի ղեկավարությամբ:
Փառատոնի ընթացքում տարբեր ոճերի և ժանրերի երաժշտություն կհնչի: Դուդուկահարներին կնվագակցի «Բոյան» պետական ակադեմիական ռուսական համերգային նվագախումբը՝ Ռուսաստանի վաստակավոր արտիստ դիրիժոր Նիկոլայ Ստեփանովի ղեկավարությամբ:
Դուդուկի Մոսկվայի փառատոնը անցկացվում է ամեն տարի և դարձել է Ռուսաստանի մշակութային կյանքի կարևոր իրադարձություններից մեկը:
