ԵՐԵՎԱՆ, 6 հոկտեմբերի — Sputnik. Համբուրգցիները գանձը գտել են Լեհաստանում` ղեկավարվելով պապի նկարած քարտեզով։ Այդ մասին հաղորդում է ՌԻԱ Նովոստին։
«Շաբաթ օրը քաղաք են ժամանել երկու գերմանացիներ։ Նրանց մոտ եղել է ձեռքով նկարված 1952թ-ի քարտեզ», — Onet պորտալին պատմել է Լյուբոմեժ քաղաքի քաղաքապետ Վեսլավ Ժուլկովսկին։
Հայտնի է, որ երիտասարդ գերմանացիները ժամանել են Համբուրգից։ Նրանց խոսքով` իրենց պապն ինչ-որ ժամանակ ապրել է Լյուբոմեժում և այդ տեղանքում գանձ է թաղել։
«Եղևնու տակ թաղված է եղել երկու կոտրված տարա։ Ներսում եղել են ժամացույց, բիժուտերիա, 19-րդ դարի մետաղադրամներ, ականջօղեր, կախազարդեր, մատանիներ, ինչպես նաև 1935թ-ի պորտսիգար»,- պատմել է Ժուլկովսկին։ Քաղաքապետի խոսքով` հայտնաբերված իրերն ուղարկվել են տեղական ինքնավարության մարմին։ Դրանք պետք է մաքրել, գույքագրել և գնահատել արժեքը։ Եթե պարզվի, որ իրերը պատմական արժեք ունեն, ապա գտածոն ոչ թե կտան գերմանացիներին, այլ կուղարկեն տեղի թանգարան։
