ԵՐԵՎԱՆ, 10 հոկտեմբերի — Sputnik. «Մեր տուն» հասարակական-սոցիալական կազմակերպությունը նշեց իր գործունեության 10-ամյակը: Այն հոգ է տանում մանկատների շրջանավարտ 18-23 տարեկան երիտասարդ աղջիկների մասին:
Հասարակական կազմակերպությունն առաջին անգամ դռները բացել էր Էջմիածին քաղաքի մանկատների շրջանավարտների առջև: Մասնավորապես, այն բնակարան է հատկացնում այն աղջիկներին, որոնք մեծացել են մանկատներում կամ անբարենպաստ սոցիալական պայմաններում: Ինչպես նշեց կազմակերպության փոխտնօրեն Մարիամ Կիրակոսյանը, «Մեր տունը» աջակցում է աղջիկներին, որպեսզի նրանք չբախվեն չափահաս կյանքի խնդիրների հետ և չգնան սխալ ճանապարհով:
«Սա առաջին կազմակերպությունն է Հայաստանում, որն անտարբեր չէ մանկատների սաների ճակատագրի հանդեպ: Մեզ մոտ աղջիկները հիմնականում զբաղվում են ձեռագործությամբ, խոհարարությամբ և ոչ միայն: Մենք ամեն կերպ օգնում ենք նրանց, որպեսզի նրանք ոչ մի բանի կարիք չունենան և կարողանան կրթություն ստանալ»,- ասաց Կիրակոսյանը:
Նրա խոսքով՝ աղջիկների համար կազմակերպվում են տարբեր դասընթացներ: Օրինակ` փոխտնօրենը դասավանդում է կրոն, մյուս ուսուցիչները դասավանդում են օտար լեզուներ և այլ առարկաներ: Իր գործունեության ընթացքում «Մեր տունն» օգնել է 50 աղջիկների, որոնցից 16-ը հաջող ամուսնացել է:
«Մենք 17 թոռնիկ ունենք, սպասում ենք ևս երկուսին: Աղջիկները շատ ամուր և հաջող ընտանիքներ են ստեղծել»,- ասաց Կիրակոսյանը: Այսօր աղջիկներն իրենց ձեռքով գորգ էին գործել, նկարել, պատրաստել կավե ափսեներ, տարբեր ձեռագործ իրեր, թեյ, մուրաբա, որոնք կարող էին ձեռք բերել այցելուները:
Sputnik Արմենիայի հետ զրույցում «Մեր տան» սան Արփինեն պատմեց, որ սաները պատրաստել են նաև համերգային ծրագիր:
Նա խորհուրդ տվեց աղջիկներին, որոնք զրկված են աջակցությունից. «Չի կարելի հույսը կորցնել: Գլխավորն է սկսել սովորել, անհրաժեշտ է յուրաքանչյուր ոլորտում հասնել հաջողության, ինչը և կօգնի հետագայում արժանի կյանք ապահովել»:
Միջոցառմանը հրավիրված էր Էջմիածնի քաղաքապետ Կարեն Գրիգորյանը, որն աջակցում է կազմակերպությանը և կարևորում նրա գործունեությունը: «Մեր տան» 10-ամյակին ներկա էին նաև երգչուհիներ Սյուզան Մարգարյանը, Ալլա Լևոնյանը և ուրիշները:
