ԵՐԵՎԱՆ, 11 հոկտեմբերի-Sputnik. Սիրիահայ ընտանիքները, գալով Հայաստան, ուզում են ապրել Երևանում, սա այն դեպքում, երբ մարզերում բնակվելու պարագայում միջազգային կազմակերպությունների կողմից տրվող աջակցությունը ոչ թե ամիսների, այլ 2 տարվա համար է, լրագրողներին հայտնեցին Հայկական Կարմիր խաչի ընկերության, «Օքսֆամ» և «Առաքելություն Արևելք» կազմակերպությունների ներկայացուցիչները։
«Նրանք հրաժարվում են անգամ Դիլիջանում գտնվող սոցիալական բնակարաններից»,- ասացին բանախոսները։
Այս պահի դրությամբ Սիրիայում մնացել է 13-14 հազար սիրիահայ։ Նրանց մի մասը պատրաստվում է գալ Հայաստան, սակայն դեռ չի շտապում. նրանք լավ գիտեն, որ եթե թողնեն իրենց տունն ու տեղը, ապա վերադառնալիս թալանված կտեսնեն։ Վերջին մեկ շաբաթվա ընթացքում Հայաստան է ժամանել սիրիահայ 2 ընտանիք։
Հայաստանում «Օքսֆամի» գրասենյակն արդեն երկրորդ տարին է ներգրավված սիրիահայերին աջակցություն ցուցաբերելու, տան վարձը մասնակի փոխհատուցելու գործում։
Այն մարդիկ, որոնք գալիս են Հայաստան և գտնվում են ֆինանսապես ոչ ապահով վիճակում, կարիք ունեն տուն վարձելու, մոտավորապես 3 ամսվա կտրվածքով 60-80 հազարի շրջանակում օգնություն ենք տրամադրում։ Անցյալ տարի 300 ընտանիքի նման աջակցություն է ցուցաբերվել, այս տարի էլ մոտ 300 ընտանիքի աջակցություն է ցուցաբերվելու»,-ասաց կազմակերպության հայաստանյան գրասենյակի տնօրեն Մարգարիտա Հակոբյանը։
Հայկական Կարմիր խաչի ընկերությունն էլ սիրիահայերին աջակցում է 2012 թվականից, այն պահից, երբ սկսվեց սիրիահայերի ներհոսքը։ Սկզբում նրանք ներգրավվեցին փախստականների համար իրականացվող ծրագրերում, սակայն, հաշվի առնելով իրավիճակը, սկսեցին ծրագրեր իրականացնել հատուկ սիրիահայերի համար։
«Գնահատելով նրանց կարիքները` տրամադրվում էր մարդասիրական օգնություն` առաջնային անհրաժեշտության իրեր, հիգիենայի պարագաներ, սնունդ, քրոնիկ հիվանդներին` դեղորայք, հետագայում արդեն, հաշվի առնելով սիրիահայերի ցանկությունը, որ իրենք են ուզում աշխատել ու լուծել իրենց խնդիրները, ներդրվեց տնտեսական ինքնաբավության բաղադրիչը, այսինքն` սիրիահայերին տրամադրվում էին գործիքներ, որպեսզի կարողանան այստեղ բիզնես սկսել, օգնությունից կախված չլինեն»,- ասաց Հայկական կարմիր խաչի ընկերության լրատվության լուսաբանման բաժնի վարիչ Նունե Գրիգորյանը։
Նա հայտնեց, որ եթե այս օրերին սիրիահայերի ներհոսք լինի, նրանք կարող են դիմել Կարմիր խաչի և Կարմիր մահիկի ընկերությունների ֆեդերացիայի արտակարգ իրավիճակների արձագանքման ֆոնդ, որպեսզի հնարավոր լինի արձագանքել առաջնակարգ կարիքներին։
«Առաքելություն Արևելքն» էլ այս տարվանից է ընդգրկված սիրիահայերին աջակցելու գործում։ Նրանք համագործակցում են մարդասիրական աջակցություն ցուցաբերող գրեթե բոլոր կազմակերպությունների հետ։
«Բազմակողմանի մոտեցում է պետք, եթե նրանք գան Հայաստան ու այստեղ սոցիալական խնդիրներ ունենան, մեր բոլորի նպատակն է նրանց օգնել»,-ասաց «Առաքելություն Արևելք» մարդասիրական օգնության կազմակերպության տարածաշրջանային գրասենյակի տնօրեն Արմեն Բեժանյանը։
Սիրիահայերի խնդրով մտահոգ են նաև անհատները։ Օրինակ` այսօր Սիրիայից Հայաստան է գալիս Գալուստյանների ընտանիքը` երկու երեխաներով։ Հալեպում ուժգին հրթիռակոծությունից փլվել է նրանց բնակարանը, և երեխաները հրաշքով փրկվել են փլատակաների տակից։ Հայաստանի բնակիչ, մասնագիտությամբ ֆիզիկոս Կարինե Յարմոլյանն անտարբեր չի գտնվել նրանց ճակատագրի նկատմամբ. սոցցանցերից իմանալով ընտանիքի մասին` նա որոշել է աջակցել ընտանիքին` նրանց համար վարձելով կահավորված բնակարան։
Վարչապետ Կարեն Կարապետյանը ևս նախօրեին հրավիրել էր խորհրդակցություն` քննարկելու սիրիահայերին օժանդակելու հարցերը։ Վարչապետը հանձնարարել է բոլոր մարմիններին համագործակցել ՀՀ արտաքին գործերի և սփյուռքի նախարարությունների հետ։
