ԵՐԵՎԱՆ, 14 հոկտեմբերի — Sputnik. Վլադիկավկազի հիվանդանոցներում դեռ տասը մարդ կա, որոնց վիճակը գնահատվում է տարբեր աստիճանի ծանրության։ Նրանց շարքում կա հինգ անչափահաս, որոնցից մեկը Հայաստանի քաղաքացի է։ Վլադիկավկազի բժշկական հաստատություններ տեղափոխված տուժածներից հինգը երեխաներ են, հինգը` մեծահասակներ։
«Երեխաներից չորսը մարզիկներ են, Դոնի Ռոստովից ուղևորվում էին Հայաստան` կարատեի մրցումների մասնակցելու, մեկն էլ 10 տարեկան աղջիկ է` Հայաստանի քաղաքացի», — Sputnik Արմենիայի թղթակցի հետ զրույցում ասաց Հյուսիսային Օսեթիայի կառավարության ղեկավարի տեղակալ Իրբեկ Տոմաևը։
Տոմաևի խոսքով` նրանց կյանքին վտանգ չի սպառնում` չնայած նրան, որ «Շտապօգնության» կլինիկական հիվանդանոցում գտնվող ՀՀ երկու քաղաքացու վիճակը ծանր էր գնահատվում։ Տոմաևը նշեց, որ այդ գործով քննությունը շարունակվում է, սակայն առայժմ հիմնական վարկածն այն է, որ ավտոբուսի վարորդը քնել է ավտոբուսը վարելու պահին ։
Վթարը տեղի է ունեցել Բեսլանի մոտ ժամը 04:30-ին։ Մոսկվա-Երևան երթուղին իրականացնող ուղևորատար ավտոբուսը բախվել է ճամփեզրին կայանած բեռնատարին։ Ավտոբուսում 52 մարդ է եղել, գրեթե բոլորը` Հայաստանի քաղաքացիներ։
